13.09.2011 Сит илдә белем алыу – хыял түгел

һәләтле йәштәргә абруйлы сит ил вуздарында белем алыу өсөн Башҡортостан Хөкүмәте гранттар бүлә.
2010 – 2012 йылдарға тәғәйенләнгән сит илдә Башҡортостан Республикаһы кадрҙарын әҙерләү, ҡайтанан әҙерләү һәм квалификацияһын күтәреү буйынса республика маҡсатлы программаһына ярашлы, йыл һайын бер төркөм һәләтле йәш кеше сит ил вуздарына уҡырға ебәрелә. Сит илдәрҙә уҡыясаҡ йәштәр БР Хөкүмәте һәм Мәғариф министрлығы тарафынан ойошторолған конкурс нигеҙендә һайлап алына. Конкурста ҡатнашыусылар мотлаҡ юғары белемгә эйә булыр­ға һәм сит телде яҡшы белергә тейеш. Улар инглиз теле буйынса халыҡ-ара имтихан тапшыра.
Грант алыусылар Германия, Америка, Австрия, Венгрия, Бөйөк Британия, Канада, Мальта һәм башҡа илдәрҙең бөтә донъяға билдәле уҡыу йорттарында ауыл хужалығы, административ идара итеү, белем биреүҙә инновацион йүнәлештәр, инновацион менеджмент, халыҡ-ара хоҡуҡ, халыҡ-ара иҡтисад, архитектура һәм төҙөлөш, информацион технологиялар, социаль яҡлау, франдрайзинг йүнәлештәре буйынса белемен камиллаштыра.
2009 йылда бөтәһе 37 кеше сит илдә белемен камиллаштырыу хоҡуғын яулағайны. 2010 йылда тағы ла 28 кеше Башҡортостан Хөкүмәте грантына лайыҡ була. Быйыл тағы ла биш кеше Бөйөк Британия, Швейцария, Германия вуздарында профессиональ белемен нығытасаҡ.