12.07.2013 Шатлыҡ өҫтөнә шатлыҡ

Әбйәлил районының Байым ауылы халҡы балалар һабантуйы үткәрҙе

Йәй − иң күңелле, балалар һағынып көтөп алған осор, сөнки ҡайнар ҡояш ҡыҙҙырғанда рәхәтләнеп һыу инергә, ҡыҙынырға, ләззәтләнеп еләк-емеш ашап, ҡорһаҡ тултырыр­ға, урамда хәлдән тайғансы уйнарға мөмкин. Әбйәлил райо­нының Байым ауылында йәшәүсе ҡыҙ һәм малайҙар өсөн иһә быйылғы йәй уртаһы айырыуса иҫтәлекле булды − каникулдарын яңы яҡты тойғоларға байытып, балалар һабантуйы уҙҙы. Ауылыбыҙҙың алмаштырғыһыҙ старостаһы Ғәҙел Моратовтың тәҡдиме менән, урындағы депутаттар ярҙамында үткәрелгән сара шул тиклем шәп килеп сыҡты! Уҡыусылар Руслан һәм Данил Толонғужиндар, Фәнил Моратов, Илдар Вәлитов, Динис Әхмәтов һәм башҡалар иртә менән майҙансыҡ әҙерләне. Приздар, бүләктәр уҡыусылар йыйып тапшыр­ған металл һыныҡтары аҡсаһына алынды. Төрлө уйындарҙа, ярыштарҙа балалар ихлас ҡатнашты. Һәм иң мөһиме, тоҡ кейеп, ҡалаҡҡа йомортҡа һалып йүгереү, ҡул көрәштереү, футбол һәм башҡа уйындарҙа ҡатнашыусыларҙың береһе лә бүләкһеҙ ҡалманы! Етмәһә, эшҡыуар Лидар Әхтәмов бәләкәстәргә батут алып килеп ҡыуандырҙы: кескәйҙәрҙең ҡулдарын болғай-болғай һикереп-тәгәрәүен күҙәткән һәр кемдең кәйефе күтәрелде. Ғаилә көнө алдынан үткәрелгән байрамдан атай-әсәйҙәр, олатай-өләсәйҙәр ҙә ситтә ҡалманы. Дәртләнеп киткән атай-әсәйҙәр командаһы хатта балалар менән бергә пейнтбол уйнаны!
Уйнап, йүгереп арыған бәләкәстәрҙе Гөлсөм Йәһүҙина, Әлфиә Балхина һут һәм тәмлекәстәр менән һыйланы. Көнө буйы барған байрамдан барыһы ла ҡәнәғәт таралышты. Һәм шул саҡта балаларҙың, өлкәндәрҙең ҡыуанысын уртаҡ­лашыр­ға ашыҡҡандай, зарыҡтырып оҙаҡ көттөргән ямғыр килеп етте – шатлыҡ өҫтөнә шатлыҡ өйөлдө!

Әмилиә ҒӘЛИКӘЙЕВА.

Әбйәлил районы,
Байым ауылы.