25.01.2013 Өфө VI Ҡышҡы халыҡ-ара балалар уйындарына әҙер

Баш ҡала 26 февралдән 3 мартҡа тиклем үтәсәк ҙур спорт сараһына яуаплылыҡ менән әҙерләнә һәм бөгөндән үк ҡатнашасаҡ спортсыларҙы ҡабул итеүгә әҙер. Был хаҡта Мәскәүҙә, Башҡортостандың Рәсәй Президенты ҡарамағындағы Тулы хоҡуҡлы вәкиллегендә, үткән федераль киң мәғлүмәт саралары ҡатнашлығында үткән матбуғат конференцияһында Халыҡ-ара балалар уйындары комитетының генераль секретары Ричард Смит белдергән. Ул, Халыҡ-ара балалар уйындары комитеты президенты Торстен Раш етәкселегендәге техник комиссия составында, ярыштар үтәсәк дүрт спорт объектын ҡарап сыҡҡандан һуң, шундай фекергә килгән.
Халыҡ-ара балалар уйындарының Өфөләге дирекцияһы етәксеһе Сергей Степанов бындай мөһим спорт форумын ҡабул итеү республикаға ҙур хөрмәт булыуын билдәләй. Ярыштарҙан тыш, балаларға ҡыҙыҡлы күңел асыу программаһы ла тәҡдим ителәсәк. Спортсылар йәшәйәсәк “Йәшел сауҡалыҡ” шифаханаһында йәш­тәр өсөн дискотека, төрлө уйындар ойоштороласаҡ, тренажер залы, бассейн һәм һырғалаҡ эшләйәсәк.
БР йәштәр сәйәсәте һәм спорт министры Андрей Ива­нюта бындай спорт саралары донъяның төрлө илдәренән үҫ­мерҙәргә дуҫлашып, артабан да аралашып йәшәргә мөмкинлек бирәсәген билдәләй.
РФ Дәүләт Думаһы депутаты Рима Баталова ла, матбуғат конференцияһында ҡатнашып, әле­ге уйындарҙы физик мөмкинлектәре сикләнгән балалар­ҙың да ҡарарға әҙерләнеүен әйтте.
VI ҡышҡы халыҡ-ара балалар уйындарында ете спорт төрө ҡаралған. Ярыштарҙа Рәсәйҙең 30 ҡалаһынан һәм донъяның 20 иленән йәмғеһе 800-гә яҡын спортсы ҡатнашасаҡ. Өфөлә сувенир продукцияһы һатыла башланы. ҡыҙыҡһыныусыларға өҫтәлгә ҡуя торған һәм кеҫә календарҙары, магниттар, башлыҡ, бейәләй, шарф тәҡдим ителә. Сувенирҙар һатылған магазиндарҙың адресы 2013 йылғы Халыҡ-ара балалар уйындары сайтында урынлаштырыл­ған.