24.07.2012 Остаз остаз инде

Финалда Стәрлетамаҡ батыры Алик Яҡупов үҙ уҡыусыһын еңеп, Башҡортостан чемпионы булды
Йола буйынса, республикала һабантуйҙар тамамлан­ғас, көрәш батырҙары бер урынға йыйылып, үҙ-ара көс һынаша. Быйыл да Өфөнөң «Динамо» стадионына Башҡортостандың һәр төбәгенән бил бирмәҫ батырҙар йыйылды. Көрәш майҙаны гөрләп торҙо был көндө.

Һабантуй батырҙарын тәбрикләргә һәм, әлбиттә, дәртләндерергә БР йәштәр сәйәсәте һәм спорт министры Андрей Иванюта, мәғариф министры Әлфис Ғаязов, милли көрәш һәм билбау көрәше буйынса федерация рәйесе, Рәсәй чемпионы Вәкил Ильясов һ.б. килгәйне.
Республика чемпионы исеменә 100-гә яҡын көрәшсе көс һынашты. Улар араһында көрәш буйынса донъя чемпионы Рәдиф Аҡсурин, билбау көрәше буйынса донъя чемпионы Альберт Рәхмәтуллин, өс тапҡыр донъя чемпионы Юрий Сабановтар ҙа бар ине.
Рәсәйҙең көрәш буйынса өс тапҡыр чемпионы булған Стәрлетамаҡ батыры Алик Яҡупов менән уның уҡыусыһы, Мәләүездән Альберт Рәхмәтуллиндың майҙанда осрашыуы бигерәк тә һоҡландырғыс тамаша ине. Ике көрәшсенең бер-береһенә бил бирмәй, таһыллыҡтарын оҫта күрһәтеүе барлыҡ тамашасының иғтибарын яуланы. Шулай ҙа тәжрибә үҙенекен итте – остаз уҡыусыһын еңде һәм республиканың абсолют батыры исемен Алик Яҡупов алды. Уға чемпионаттың төп бүләге – автомобиль тапшырылды.
Дөйөм командалар күрһәткесенә килгәндә, Өфө көрәшселәре беренсе урын алды, икенселә – Салауат районы, өсөнсөлә – Ауырғазы батырҙары.

А. ЗИННУРОВА.