03.02.2012 Александр Радулов өфөләр өсөн йөҙөнсө шайбаһын индерҙе

Ауыр, әммә кәрәкле еңеү яуланы юлаевсылар. КХЛ беренселегенең сираттағы уйынында «Салауат Юлаев» командаһы ҡаҙағстанда «Барыҫ» хоккейсылары менән көс һынашты. Ғөмүмән, дивизиондаш күршеләр быға тиклем үҙ-ара өс осрашыу үткәргәйне инде. Береһендә «Барыҫ» уйынсылары өҫтөнлөк итһә, икәүһендә еңеү өфөләр яғында була. Хужаларға, турнирҙағы хәлен яҡшыртыр өсөн, еңеү ҡунаҡтарға ҡарағанда ла кәрәгерәк була. Шуға ла улар осрашыуҙы өҫтөнлөк менән башлай. Юлаевсылар күберәк хаталана һәм тәртип боҙорға мәжбүр була. Бер-бер артлы штраф эскәмйәһенә ултырып, «Барыҫ»тың һөжүмдәренә өлгөрә алмай, үҙ ҡапҡаһына гол үткәртәләр.
Икенсе осор алдындағы тәнәфес ҡунаҡтар өсөн файҙаға ғына була. Беренсе звенобыҙҙың һөжүмселәре берәр тапҡыр уңышҡа өлгәшеп, өфөләрҙе алға сығара. Хужалар бер шайба менән яуап бирә, әммә Зиновьевтың дүртенсе голы беҙҙекеләргә еңелерәк тын алырға булышлыҡ итә. «Барыҫ»тар уйнауҙан туҡтамай, һөжүм артынан һөжүм ойоштороп, бар тырышлығын һалып, иҫәпте йәнә ҡыҫҡарта. Улар бының менән генә туҡтамай, һаман Эрсбергтың ҡапҡаһына ябырыла. Тик, нисек кенә булмаһын, Венер Сафиндың тәрбиәләнеүселәре, оҫта һаҡланып, ҡумтаһын тулы өс мәрәй менән байыта. Хәҙер улар 47 уйындан һуң 82 мәрәй менән үҙ дивизионында юғары урында нығынып, дөйөм таблицала бишенсе баҫҡыста килеүен дауам итә. Шуныһы мөһим: өфөләрҙең алтынсы осрашыу рәттән еңелеү белгәне юҡ. КХЛ беренселеге бомбардиры, «Салауат Юлаев» командаһы һөжүмсеһе Александр Радулов өфөләр составында уйнағаны бирле 100-сө шайбаһын индереп, үҙенсә рекорд ҡуйҙы. Әлеге уның тирәһендә йөрөгән имеш-мимештәр ҙә дөрөҫ түгел. Ул миҙгел аҙағынаса юлаевсылар сафында уйнаясаҡ.

Н. ТИМЕРОВ.