05.07.2013 Был аҙнала беҙҙе йылмайтты
Америка махсус хеҙмәттәренең йәшерен операциялары, йәғни миллионлаған телефон һөйләшеүен, ҙур компанияларҙың интернет-серверҙарын ҡарау-тыңлау хаҡындағы мәғлүмәтте донъяға таратҡандан һуң ҡасып йөрөгән Эдвард Сноуден әфәнде тураһында бөгөн күп һөйләйҙәр.
Һуңғы мәғлүмәттәр буйынса, ул әле Рәсәйҙә, “Шереметьево” халыҡ-ара аэропортының транзит зонаһында. Президент Владимир Путиндың матбуғат секретары Дмитрий Песков еткереүенсә, Рәсәй үлем язаһы булған илгә ҡасҡындарын бирмәйәсәк. Путин үҙе Сноуденға шарт ҡуйған – АҠШ-ҡа ҡаршы эшләүен туҡтатһа ғына беҙҙең илдә ҡалыуы мөмкин. Ә ҡасҡын риза булмаған һәм, моғайын, китер ҙә.
Ана шул ҡасҡынға элекке Рәсәй шпионы Анна Чапман тәҡдим яһаған. “Twitter” виртуаль донъяһындағы блогында туп-тура һораған: “Сноуден, һин миңә өйләнәһеңме?”. Чапман, 2010 йылда АҠШ-та, Рәсәй Хөкүмәте файҙаһына шпионлыҡ итеүҙә ғәйепләнеп, ҡулға алынғандан һуң, Американан ҡыуылған ваҡытта танылғайны. Береһе ҡасҡан, икенсеһе ҡыуылған, дөйөм алғанда, бәләләре оҡшашыраҡ был кешеләр парлашһа, ҡалай үҙенсәлекле биографиялы ғаилә булыр ине.
Оҡшаш яңылыҡтар
