03.07.2012 Киоскыла һыра һатыу тыйыла

Быйыл илебеҙҙә һыра һатыу, уны йәмәғәт урындарында ҡулланыуға ҡағылышлы закондар ҡабул ителде. Уларҙың бер өлөшө 1 июлдән үҙ көсөнә инде, ә ҡайһыһы 2013 йылдың 1 ғинуарынан тормошҡа ашырыласаҡ.

Бөгөндән йәмәғәт урындарында, урамда, паркта, подъезда, ихата алдында, баҙарҙа һәм башҡа ерҙә һыра эсеү тыйыла. Тик туҡланыу урындарында йәки өйҙә генә ҡулланырға мөмкин.
Һыраның ҙур градуслы сорттары менән тик стационар магазиндар­ҙа ғына сауҙа итергә була, ә киоскыла ҡатылығы 5 проценттан юғары булған һыраны һатыу рөхсәт ителмәй. Спорт, балалар һәм белем биреү учреждениелары янында уны һатыу ҡәтғи тыйыла.

2013 йылдың 1 ғинуарынан түбәндәге тәртип үҙ көсөнә инәсәк.
ҡатылығы 7 процентҡа тиклем булған һыраны күләме 0, 33 литрлыҡ шешәлә генә һатырға рөхсәт ителәсәк.
Был эсемлекте киске сәғәт 11-ҙән иртәнге сәғәт 8-гә тиклем һатыу тыйыласаҡ. Был ваҡытта уны тик кафе, ресторан, бар, күңел асыу урындарында ғына алырға мөмкин буласаҡ.
Һыра тик махсуслаштырылған магазиндарҙа ғына һатыласаҡ. Бинаның дөйөм майҙаны 50 квадрат метр­ҙан бәләкәй булырға тейеш түгел. Һыра магазинының сигнализация, сейф һәм касса аппараты менән йыһазландырылыуы мотлаҡ.
Радио, телевидение һәм йәмәғәт транспортында һыра рекламаһы тыйыла. Гәзит-журналдар-ҙың тәүге һәм һуңғы биттәрендә, бәлиғ булмаған балалар өсөн тәғәйенләнгән баҫмаларҙа был эсемлекте рекламалау рөхсәт ителмәйәсәк.

Әлеге законға ҡарашығыҙ?
Был һыра алкоголизмын туҡтатыр 13
Хәҙер дуҫтар менән паркта һыра ла эсеп булмаҫ инде!.. 3
Был бары һыра етештереүселәрҙең тәгәрмәсенә таяҡ 5
Тиҙҙән илдә айыҡ кешеләр, моғайын, күбәйер 27
Закон нимәнелер үҙгәртер тип уйламайым 35

83 кеше тауыш бирҙе.
Тауыш биреү “Бәйләнештә” сайтында барҙы.

Г. ЯХИНА.