14.05.2019 Һин башҡорт теленән диктант яҙырға әҙерме?

Был аҙнаның шәмбеһендә, йәғни 18 май көндө иртәнге сәғәт 10-да БДУ-ның төп корпусында, 02-се, 01 аудиторияларҙа башҡорт теленән Халыҡ-ара диктант үткәреләсәк.

Ике аудитория ике кимәлгә тәғәйенләнгән: 1) башҡорт телендә иркен аралашыусылар өсөн; 2) телде яңы өйрәнә башлағандар өсөн.

Диктант тура эфирҙа интернет аша республикаға таратыласаҡ. Бынан тыш, акцияға сит илдәр ҙә ҡушыласаҡ. Бөгөнгә Белоруссия, Америка, Бөйөк Британия, Германия, Ирландия, Италия, Ҡаҙағстан, Канада, Ҡырғыҙстан, Латвия, Монако Короллеге, Португалия, Польша, Төркиә, Чехия, Швейцария, Швеция кеүек илдәрҙә йәшәгән милләттәштәр сарала ҡатнашыуы хаҡында белдерҙе.

Ваҡыт айырмаһы ҙур булыуы арҡаһында улар диктантты башлыса онлайн-режимда түгел, ә Башҡортостан халҡынан алда яҙасаҡ. Бының өсөн уларға алдан текст һәм билдәле шәхесебеҙ Хөрмәтулла Үтәшев уҡыуында уның видеояҙмаһы ебәреләсәк.

Рәсәй төбәктәре лә диктанттан ситтә ҡалмай. Ғәйнә башҡорттары Пермь ҡалаһының М.Горький исемендәге китапханаһында һәм Березовка районы Байтирәк ауылы китапханаһында йыйыласаҡ.

Ырғыҙ-Кәмәлек башҡорттары Һамар ҡалаһындағы Халыҡтар дуҫлығы йортонда диктант яҙасаҡ. Свердловск өлкәһе башҡорттары Урал халыҡтары йортон билдәләгән. Бынан тыш, өлкәнең Пышма (1-се мәктәп), Каменск-Уральск ҡалалары (Милли мәҙәниәттәр үҙәге) ла сарала ҡатнаша.
Диктант яҙыуға Силәбе өлкәһе (Халыҡтар дуҫлығы йорто), Ханты-Манси автономиялы округы (Сорғот ҡалаһы, Г. Пирожников исемендәге Үҙәк район китапханаһы), Ырымбур өлкәһе (Аллабирҙе ауылы мәктәбе), Татарстан (Ҡазан, Яр Саллы, Түбәнге Кама ҡалалары – бөтәһендә лә Халыҡтар дуҫлығы йорто), Ҡурған өлкәһе (Сафакүл ауылы), Санкт-Петербург (Халыҡтар дуҫлығы йорто) һәм Мәскәү (Башҡортостандың РФ Президенты ҡарамағындағы Тулы хоҡуҡлы вәкиллеге) ҡалалары ла ҡушыла.