16.08.2013 Торатауға тауыш бир!

Белеүегеҙсә, Рус география йәмғиәте, «Рәсәй» телеканалы һәм «Комсомольская правда» гәзите менән берлектә ойошторолған «Рәсәй 10» тип аталған мультимедия проекты дауам итә. Махсус рәүештә асылған сайтта Рәсәйҙең 700-гә яҡын тәбиғәт, мәҙәниәт, археология, фәнни-техник үҫеше ҡомартҡыһының фотоһүрәттәре һалынған. Проект авторҙары интернет менән ҡулланыусыларҙан сайтта үҙҙәренә оҡшаған 10 ҡомарт­ҡыға тауыш ҡалдырыуҙарын һорай. Иң күп тауыш йыйған объекттар Мәскәү өлкәһендәге «Рәсәй» ландшафт паркында урынлашасаҡ миниатюрала урын аласаҡ. Проектта Салауат Юлаев һәйкәле һәм уникаль шихандарыбыҙға тауыш биреү мөмкинлеге бар.
Сағыштырыу өсөн тәүге урындарҙы түбәндәге ҡомартҡылар: Коломна кремле, Ә. Ҡадиров исемендәге «Чечня йөрәге» мәсете, Богородица музей-ҡурсаулығы, Мамай ҡурғаны һәм «Ил-әсә саҡыра» скульптураһы, Хопер ҡурсаулығы (Воронеж өлкәһе), Екатерина скверындағы Екатерина II һәйкәле (Краснодар), Байкал күле, «Легенда» скульптураһы паркы (Пенза), «Будда Шакьямуниҙың торған алтын урыны» (Элиста) һәм Әстерхан кремле тәүге ун баҫҡысты биләй. Күрше Татарстандағы Ҡол-Шәриф мәсете 16 урында килә. Ә беҙҙең шихандарыбыҙ – 25-се, Салауат Юлаев һәйкәле 54-се баҫҡыста.
Әгәр ҙә Рәсәй кимәлендә шихандарыбыҙға иғтибар йәлеп иттерәйек тиһәгеҙ, көн дә http://10russia.ru/object_12 адресы буйынса тауыш бирегеҙ, бында тәүлегенә 3 тапҡыр тауыш биреү мөмкинлеге бар. Төбәктең данын яҡлау өсөн кеҫә телефонын да ҡулланырға мөмкин – 1880 номерына 12 12 12 йөкмәткеле смс хәбәр ебәрегеҙ. Смс хаҡы ни бары 3,54 һум, 1 хәбәр – өс тауышҡа бәрәбәр.
Тауыш биреү «Рәсәй 10» сайтында 29 сентябргә тиклем барасаҡ. Әүҙемерәк булайыҡ, дуҫтар! Республикабыҙҙың йөҙөк ҡашы булған ҡомартҡыларыбыҙға проектта еңергә бергәләп ярҙам итәйек!

Л. ҺИҘИӘТОВА.