15.02.2013 Юлдарға аҡса бүленде
Башҡортостанда “2013 – 2015 йылдарға юл хәрәкәте хәүефһеҙлеге” тип аталған маҡсатлы программа раҫланды. Уны тормошҡа ашырыу өсөн 1 миллиард 165 миллион һум аҡса бүленәсәк. Программаның маҡсаты – 2015 йылға тиклем юлдарҙа фажиғәләр һанын, 2010 йылғы күрһәткестәр менән сағыштырғанда, 9 процентҡа кәметеү. Рәсми хәбәр буйынса, 2010 йылда республикала юл фажиғәләрендә 658 кеше һәләк булған. Ә инде 2015 йылда был күрһәткес кәмендә туғыҙ процентҡа кәмер, тип ышанғы килә.
Күрһәткестәрҙе юл-транспорт фажиғәләрен алдан иҫкәртеү, аварияға эләккәндәргә беренсе медицина ярҙамын күрһәтеү системаһын камиллаштырыу, юлдарҙы хеҙмәтләндереүсе төрлө ойошмаларҙың үҙ-ара әүҙемерәк аралашыуын ойоштороу кеүек профилактик эштәр ярҙамында ыңғай яҡҡа үҙгәртергә ниәтләйҙәр.
Маҡсатлы программа федераль һәм республика бюджетынан финансланасаҡ. Шулай уҡ Өфө ҡалаһының бюджеты аҡсаһын да тотонорға иҫәпләйҙәр. Сығымдарҙың күпселек өлөшө автоҡалалар төҙөү, мәғариф һәм медицина учреждениелары эргәһенә светофорҙар ҡуйыу, юлдарҙа тәртипте көйләүсе техниканы камиллаштырыу кеүек капиталь эштәр өсөн тотоноласаҡ.
Оҡшаш яңылыҡтар
