06.07.2012 Өс һөйләм менән

Көйөргәҙе районында ҡурайсыларҙың икенсе съезы үтте. Тәүге ҡурайсылар съезы бында 100 йыл элек – 1913 йылдың көҙөндә Кинйәабыҙ ауылында үткәрелгән була. 1812 йылғы Ватан һуғышында еңеүгә 200 йыл тулыуға арналған ҡурайсылар съезында ике меңдән ашыу кеше, шул иҫәптән Башҡортостандың 27 районынан һәм алты ҡалаһынан 400-ҙән ашыу башҡарыусы ҡатнашты.

Башҡортостан Хөкүмәте коммуналь хужалыҡ объекттарын ҡышҡылыҡҡа әҙерләүгә һәм коммуналь предприятиеларға ярҙам йөҙөнән 1 миллиард 200 миллион һумдан ашыу аҡса бүлде. Аҡса субсидия сифатында муниципаль биләмәләр бюджетына йүнәлтеләсәк. Уның иҫәбенә инженерлыҡ селтәрҙәре, ҡорамалдар ремонтланасаҡ һәм алмаштырыласаҡ, резерв яғыулыҡ запасы һатып алынасаҡ.

5 – 8 июлдә «Өфө моторҙар эшләү производство берекмәһе» асыҡ акционерҙар йәмғиәте Нуриман районы Упҡанкүл буйында урынлашҡан «Упҡан» ял йортонда IX йәйге йәштәр фестивален ойоштора. Ул быйыл яңы ҡағиҙәләр буйынса үтә: һәр команда үҙенең президенты, лагеры һәм флагы менән үҙ «дәүләтен» ойоштора. Упҡанкүл буйындағы байрамда ҡатнашыусыларҙы ҡаршылыҡтар менән 10 километрға йүгереү, интеллектуаль конкурс, шаяндар һәм тапҡырҙар клубы ярыштары, һыу полоһы көтә, шулай уҡ төнгө ориентирлау һәм велосипед кросы кеүек яңы конкурстар ойошторола.

Башҡортостан аграрийҙары 253 мең тонна бесән әҙерләне, был планға ҡарата 35 процентҡа тиң. 558 мең тонна (25 процент) сенаж һалынған. Мал башына иҫәпләгәндә, Яңауыл районында – 16,1, ҡалтасыла – 12,7, Борайҙа – 12,5, Благовещенда 12,4 центнер аҙыҡ берәмеге һаҡлауға һалынған.

Үткән аҙнала республикала 708 кешегә талпан ҡаҙалған. Дөйөм алғанда, дауалау-профилактика учреждениеларына медицина ярҙамы һорап 15598 кеше мөрәжәғәт иткән. Былтыр ошо осорға ҡарата иһә талпандан зыян күреүселәр һаны ике мең кешегә әҙерәк булған.

Сибай ҡалаһында 220 урынлыҡ балалар баҡсаһы төҙөлә, уны йыл аҙағына тапшырырға планлаштыралар. Бынан тыш, 2011 йылдың октябрендә Арҡайымда 150 урынлыҡ «башланғыс мәктәп – балалар баҡсаһы» комплексы сафҡа индерелгән. Шулай уҡ ҡаланың Чайковский урамындағы балалар баҡсаһы, бинаһы кире ҡайтарылып, быйыл март айында үҙенең тәрбиәләнеүселәрен ҡабул иткән.

С. ЛОТФУЛЛИНА әҙерләне.