29.03.2013 Мәҙәниәт хеҙмәткәрҙәре бүләкләнде
Башҡорт дәүләт опера һәм балет театрында мәҙәниәт хеҙмәткәрҙәренең һөнәри байрамдары уңайынан бер төркөм талант эйәһе бүләкләнде.
БР Хөкүмәте Премьер-министры урынбаҫары Лилиә Ғүмәрова ҡулынан Салауат Юлаев орденын РСФСР-ҙың, Башҡортостандың һәм Татарстандың халыҡ артисы Нурия Ирсаева, күренекле ҡумыҙсы, РСФСР-ҙың һәм БАССР-ҙың атҡаҙанған мәҙәниәт хеҙмәткәре, Салауат Юлаев исемендәге дәүләт премияһы лауреаты Роберт Заһретдинов һәм Ишембай районының балалар сәнғәт мәктәбенең Маҡар филиалы мөдире Мәрйәм Солтанова алды. Флорид Бүләковҡа – “Башҡортостандың халыҡ яҙыусыһы”, һынлы сәнғәт оҫтаһы Рәшит Хәбировҡа – “Башҡортостандың атҡаҙанған рәссамы”, билдәле журналист Нина Жиленкоға “Башҡортостандың атҡаҙанған мәҙәниәт хеҙмәткәре” тигән маҡтаулы исемдәр бирелде.
БР мәҙәниәт министры Әминә Шафиҡова Өфө һәм Стәрлетамаҡ бейеүселәренә, опера артистарына һәм Салауат башҡорт драма театры директоры Нәйлә Сәфәрғоловаға министрлыҡтың Маҡтау ҡағыҙҙарын тапшырҙы. Шулай уҡ бер төркөм район китапханалары, ауыл музейҙары хеҙмәткәрҙәре, сәнғәт мәктәбе уҡытыусылары Маҡтау ҡағыҙҙарына лайыҡ тип табылды, уларҙы РФ Дәүләт Думаһының Мәҙәниәт буйынса комитеты рәйесе урынбаҫары Зөһрә Рәхмәтуллина ҡотланы.
Л. ҒӘЛИМЙӘНОВА.
Оҡшаш яңылыҡтар
15.08.2019 - Мәҙәниәт һәм сәнғәт Рәсәйҙең атҡаҙанған мәҙәниәт хеҙмәткәре Рәйес ИСМӘҒИЛЕВ: “Һуғыш суҡмары булдым”
20.04.2019 - Мәҙәниәт һәм сәнғәт Башҡортостандың атҡаҙанған артисы Лилиә РӘСҮЛЕВА: «Күңелем романтикаға тартыла»
