28.02.2014 Хәйбуллала ла – Олимпиада
Байғусҡар мәҙәниәт йорто төрлө төҫтәге бәләкәй флагтар, Башҡортостан һәм Рәсәй флагы, “Һаумы, олимпиада!”, “Беҙ – сәләмәт тормош яҡлы!” плакаттары менән биҙәлгән, Олимпиадаға арналған матур йырҙар яңғырай. Сочи ҡалаһында ХХII Ҡышҡы Олимпия уйындары башланыуға арнап, ауыл мәҙәниәт йортонда спорт байрамы үткәрелде. Бындай күркәм сарала ауылдың йәше лә, ҡарты ла бик әүҙем ҡатнашты. Ярыштар башланыр алдынан, ауыл китапханасыһы Резеда Ҡолсонбаева Олимпиада уйындарының нисек, ҡайҙа барлыҡҡа килеүе тарихы менән таныштырып үтте.
Мәктәптең физкультура уҡытыусыһы Кәбир Баймырҙин ҡатнашыусыларҙы төрлө ярыштар менән таныштырҙы. Бына улар – саңғы, гер күтәреү, армспорт, шашка, пневматик винтовканан атыу, дартс, скакалкала һикереү, теннис. Тәүге ярыш саңғыла уҙышыуҙан башланып китте. Шәйнур Баймырҙин – 1-се, Рәлис Дәүләтбаев – 2-се, Ғәлинур Баймырҙин 3-сө, өлкәндәр араһында башҡорт теле һәм әҙәбиәте уҡытыусыһы Әлфиә Баймырҙина 1-се урын яуланы. Гер күтәреүҙә 1-се урын – Вадим Баястановҡа, 2-се – З. Исмәғилев исемендәге Өфө дәүләт сәнғәт академияһы студенты Йәмил Баймырҙинға, 3-сө урын Нәзиф Аҡбалинға бирелде. Ҡул көрәштереүҙә ир-егеттәр араһында Фәнил Хажиәхмәтов – 1-се, Өлфәт Баймырҙин – 2-се, Вадим Баястанов 3-сө урын алды. Ҡатын-ҡыҙҙар араһында Әлфиә Баймырҙина – 1-се, Әлфиә Айытбаева – 2-се, Рита Дәүләтбирҙина – 3-сө урынға, балалар араһында (ҡыҙҙар) Яҙгөл Ҡолсонбаева – 1-се, Зәриә Ибраҡова – 2-се, Земфира Дәүләтбирҙина 3-сө булды. Ә малайҙар араһында Шәйнур Баймырҙин – 1-се, Рәғип Сынбулатов – 2-се, Рәлис Дәүләтбаев 3-сө урындарҙы бүлеште. Шашка ярышында БДУ студенты Гөлнар Баймырҙина 1-се урынды бер кемгә лә бирмәне, Әлфирә Дәүләтбирҙина 2-се урын менән ҡәнәғәтләнде, Ләйсән Дәүләтбирҙина, Зөлфирә Ниғмәтуллина, Ғариф Баймырҙин да әүҙем ҡатнашты. Пневматик винтовканан атыуҙа ир-егеттәрҙән Әхтәм Килдебаев, Вадим Баястанов, Йәмил Баймырҙин тәүге өс урынды биләһә, ҡатын-ҡыҙҙарҙан Айһылыу Дәүләтбирҙина – 1-се, Әлфиә Баймырҙина – 2-се, биология һәм химия уҡытыусыһы Нәйлә Рәмова – 3-сө, малайҙарҙан Ғәлинур Баймырҙин – 1-се, Ғәзиз Аҡбалин – 2-се, Ислам Бикбов 3-сө урынға сыҡты. Дартс ярышында башланғыс кластар буйынса Иштуған Торомтаев – 1-се, Рифат Тажетдинов – 2-се, Айгиз Аҡбалин 3-сө урын алһа, өлкән кластарҙан Ислам Бикбов, Ғәҙел Аҡбалин, Шәйнур Баймырҙин, ҡыҙҙарҙан Гөлдәриә Баймырҙина, Зәриә Ибраҡова, Земфира Дәүләтбирҙина, ир-егеттәрҙән Йәмил Баймырҙин, Айбулат Дәүләтбирҙин, Хәлил Вәлиев, ҡатын-ҡыҙҙарҙан Нәйлә Рәмова, Әлфиә Баймырҙина, Гөлгөнә Сирбаева тәүге урындарға дәғүә итте. Скакалкала һикереүҙә Фәнзилә Йомағолова, Әлфиә Айытбаеванан оҫта һикереүсе булманы. Төрлө спорт ярыштарында Динар Килдебаев, Наҙгөл Хәбибуллина, Мораҙым Ниғмәтуллин, Гөлирә Баймырҙина, Фәнзил Сынбулатов, Искәндәр Рәмов, Фидан Дәүләтбирҙин һынатманы. Бына уйындың аҙағы ла етте һәм еңеүселәргә маҡтау ҡағыҙҙары тапшырылды. Был спорт уйындары бөтәһенең күңеленә хуш килгәндер, дәрт өҫтәгәндер, моғайын.
Ғәлиә ҒИЛӘЖЕТДИНОВА,
БДУ студенты.
Хәйбулла районы,
Байғусҡар ауылы.