16.10.2012 Булмышыбыҙ буллитмы икән?..
«Салауат Юлаев» командаһы миҙгел башланғаны бирле 16 уйындың алтыһын буллит серияһында тамамланы. Нишләптер быйыл Венер Сафиндың тәрбиәләнеүселәре ошо лотереяға дусар була. Улар юғарылағы серияның икәүһендә генә еңде. Әле лә бына 16-сы турҙа Словакияның «Слован» клубын ҡабул итеп, күп ваҡыт өҫтөнлөк итһә лә, эште буллитҡа алып барып еткерә. Һәм һөжүмсебеҙ Денис Хлыстовтың мәргәнлеге команда ҡумтаһына ике мәрәй килтерә. Ғөмүмән, өфөләр кеүек, «Витязь» уйынсылары ла буллитты «ярата». Улар ҙа еңеүсене дәғүәселәре менән алты тапҡыр асыҡлай. Шулай уҡ «Донбасс» командаһы ла уларҙан ҡалышмай. Ә бына Силәбенең «Трактор»ы ундай хәлгә бер ҙә ҡалғаны юҡ. Уларға хатта өҫтәмә ваҡыт та талап ителмәй. Даими беренселектә берҙән-бер команда тик төп ваҡытта ғына еңеүсене асыҡлай.
Шулай итеп, юлаевсылар 24 мәрәй яулап, үҙ конференцияһының бишенсе баҫҡысында урын алды. Кисә кис улар ЦСКА хоккейсылары менән сәкәләште. Данлыҡлы клуб әлегә 25 мәрәй менән Көнбайыш конференцияһының шулай уҡ бишенсе баҫҡысында килә. ҡалған осрашыуҙар ошондай һөҙөмтәгә тамамланды: «Авангард» − «Динамо» (Рига) − 4:2, «Барыҫ» − «Спартак» − 5:1, «Автомобилист» − СКА − 5:6, «Трактор» − «Атлант» − 4:2, «Металлург» (Мг.) − «Локомотив» − 2:3 (буллит), «Нефтехимик» − ЦСКА − 4:5 (От.) «Аҡ барс» − «Лев» − 4:2, «Витязь» − «Донбасс» − 0:1, «Динамо» (Мәскәү) − «Амур» − 4:1.
КХЛ беренселегендә тәүге отставка билдәле булды. Минскиҙың «Динамо»һы фин белгесе Кари Хейккиляны тренер эшенән бушатты.