14.09.2012 Маһайырға иртәрәк
2014 йылда Бразилияла буласаҡ футбол буйынса донъя беренселегенең һайлап алыу төркөм уйындары башланды. Рәсәй йыйылма командаһы яртылаш яңыртылған состав менән «Ғ» төркөмөндә Португалия, Израиль, Әзербайжан, Люксембург һәм Төньяҡ Ирландия командалары менән берлектә финалға сығырға бер путевка өсөн үҙ-ара көрәшәсәк. Әлегә Фабио Капелланың тәрбиәләнеүселәре уңышлы ғына старт алып, ике осрашыуҙа 6 мәрәй яулап, үҙ төркөмөн етәкләп ебәрҙе.
Башта Рәсәй футболсылары үҙ майҙанында Төньяҡ Ирландия уйынсыларын 2:0 иҫәбенә отто. Һуңынан, йәғни 11 сентябрҙә Израилдә урындағы команданы 4:0 иҫәбенә ҡыйратты. Голдарҙы Фәйзуллин, Кокорин һәм ике тапҡыр Кержаков индерҙе. Ғөмүмән, дәғүәсегә килгәндә, улар быға тиклем үҙ-ара ете тапҡыр осраша. Өсөһөндә еңеү тегеләр яғында булһа, икеһендә Рәсәй өҫтөнлөк итә, ә ике осрашыу тигеҙ иҫәп менән тамамлана. Шуға ла Израиль командаһы Рәсәй өсөн уңайһыҙ дәғүәсе булып һанала. Тик был юлы улар Рәсәйгә ҡаршы бер ни ҡыла алмай, моғайын, әле үк көрәштән баш тартыр. Улар һуңғы тапҡыр донъя чемпионатында 1970 йылда ғына ҡатнаша. Европа беренселегенә бөтөнләй аяҡ баҫҡаны булмай. Беҙгә лә маһайырға ярамай. Сөнки 2006 йылдан алып Рәсәй командаһы донъя чемпионатынан мәхрүм ҡалып килә.
Әлегә төркөм осрашыуҙарынан Португалия футболсылары ла алты мәрәй яулап, Рәсәй менән беренсе-икенсе урындарҙы бүлешә. 12 октябрҙә улар Мәскәүҙә үҙ-ара уйнаясаҡ.
Алһыу ИШМӨХӘМӘТОВА.