19.06.2012 Алдан чемпион булдылар, ахыры…
Беҙҙә футбол булмауын бөтәһе лә белә. Әммә барыбер күп сығымдарға ҡарамай, донъяның иң яҡшы белгесен йәлеп итеп, нимәгәлер өмөт итәләр. Футболсы бит робот түгел, уны программалап булмай. Әлбиттә, Рәсәй футболының иң төп белгесе Сергей Фурсенко дилбегәне Адвокатҡа ышанып тотторҙо, хатта чемпион итеренә инанды. Юҡ шул… Килеп сыҡманы. Элекке Рәсәй йыйылма командаһы уйынсыһы Александр Панов әйтеүенсә, ниндәй генә сит ил белгесен саҡырма, ул илебеҙҙең бер өлөшө булып ҡалырға тейеш. Шул хәтлем аҡсаға баш тренер Рәсәйҙә йәшәргә бурыслы. Телде лә белергә тейеш. Шуға ул бер нисек тә патриот була алмай. Сөнки ул – аҡса ҡоло. Шуға ла команданың нисек уйнауы уға барыбер. ҡыҫҡаса әйткәндә, Адвокат беренселекте юҡҡа сығарҙы. Чемпионаттағы иң үтемле төркөмдән ул йырлап сығырға тейеш ине. Чехияны 4:1 иҫәбенә ҡыйратҡас, беҙҙең ил командаһын барыһы ла алдан чемпион итеп бөттө. Күрәһең, хәлебеҙ ошо уйынға ғына етерлек булған. Әле Польша менән дә 1:1 иҫәбенә уйнағас, уларға бер ниндәй ҙә ҡурҡыныс янамай ине әле. Алдан күҙалланыуынса, улар һуңғы уйынды уйламай, плей-офф менән һаташҡан булғандыр. Беҙҙең йыйылма команда был юлы ла чемпион була алманы. ҡыҙғаныс. 2018 йылда беҙҙә донъя беренселеге лә булырға тора, тик уйнарҙай футболсылар бармы икән?.. Былары ҡартайҙы, ә алмаш юҡ. Данлыҡлы уйынсы – Бразилия йыйылма командаһы «йондоҙо» Пеле әйтмешләй, Бразилия командаһының хоккей буйынса чемпион булырын көтөргә генә ҡаласаҡ. Тик, ул ваҡыт ҡасан етер икән – билдәһеҙ.
Н. ТИМЕРОВ.