«Йәшлек» гәзите » Спорт » Итальяндар ҙа хоккей уйнарға өйрәнер



17.05.2019 Итальяндар ҙа хоккей уйнарға өйрәнер

Словакияла барған хоккей буйынса донъя чемпионатында Рәсәй йыйылма командаһы дүрт осрашыуҙа дүрт еңеү яулап, үҙ төркөмөн етәкләне.

Улар башта Норвегия командаһын – 5:2, һуңынан Австрияны – 5:0, Чехияны – 3:0 һәм Италия уйынсыларын 10:0 иҫәбенә ҡыйратып, юлын уңышлы дауам итте. Ҡапҡасыбыҙ Андрей Василевский икенсе уйын рәттән ҡапҡаһын «ҡоро» ҡалдырҙы. Александр Овечкин да, ниһайәт, голдарына иҫәп асты. Евгений Кузнецов та уңышҡа өлгәште. Ғөмүмән, НХЛ «йондоҙ»ҙары үҙ уйынын таба башланы.

Бөгөн беҙҙекеләр латыштарға һынау тотасаҡ. «В» төркөмөндә Швейцария коман­да­һы ла юғалтыуһыҙ килә.

«А» төркөмөндә, бөтәһен дә аптыратып, Германия хоккейсылары алға сыҡты. Улар ҙа әлегә еңелгәне юҡ. Ә бына Канада менән АҠШ уйынсылары берәр тапҡыр дәғүәселәренә отолдо. Әлегә дүрт тур һөҙөмтәһе буйынса Италия командаһы ғына дәғүәселәренең ҡапҡаһын «сылатҡаны» юҡ. Футболда улар лидерҙар рәтендә килер ине лә... Ана бит инглиздәр, хатта АҠШ командаһына ҡаршылашып, уларҙың ҡапҡаһына өс шайбаны сойорғотто. Шуға күрә, итальяндарға ла хоккей уйнап өйрәнергә күп ҡалмағандыр...





Автор: Н. Ҡәҙербаев
Фото: КХЛ


Сайтҡa күcергәБаҫып cығарырға