19.09.2016 Яҡынса һөҙөмтәләр бар

Рәсәй Үҙәк һайлау комиссияһы Дәүләт Думаһына бер мандатлы округтар буйынса депутаттар һайлауҙың яҡынса һөҙөмтәләрен баҫтырҙы.
Өфө бер мандатлы округында “Берҙәм Рәсәй”ҙән Павел Качкаев еңеп сыҡты. Уны 157 120 кеше хуплаған. Икенсе урында 51 252 тауыш менән Александр Ющенко.
Благовещен округында ла власть партияһынан Илдар Бикбаев еңеп сыҡты, уға 182 259 һайлаусы тауыш биргән.
Белорет округынан кандидат Зөһрә Рәхмәтуллина ла 127 013 тауыш йыйып дәғүәселәрен күпкә артҡа ҡалдырған. Ул ЛДПР-ҙан Иван Сухарев (53 555), “Ғәҙел Рәсәй”ҙән Гаджимурат Омаров (29 722) менән һынашты.
Салауат бер мандатлы округында еңеүсе – Зариф Байғусҡаров. Ул 174 345 тауыш йыйған, ә дәғүәселәре “Ғәҙел Рәсәй”ҙән Раил Сарбаевты – 51 379, Коммунистар партияһынан Юнир Ҡотлоғужинды 43 405 кеше һайлаған.
“Берҙәм Рәсәй” партияһынан тағы бер еңеүсе – Стәрлетамаҡ округынан Алексей Изотов. Ә бына Нефтекама округында власть партияһы түгел, “Гражданлыҡ платформаһы” кандидаты Рифат Шайхетдинов алға сыҡҡан. Уның өсөн 146 324 мең һайлаусы тауыш биргән. Бәлки, еңеүе мөмкин дә булмаҫ ине, шул округтан “Берҙәм Рәсәй” партияһы кандидаттары Рафаэль Мәрҙәншин менән Рима Баталова төбәк исемлеге буйынса һайланыуҙары сәбәпле, дәғүәләшеү стартына сыҡманы.