16.10.2012 Малдар битарафлыҡ ҡорбанымы, әллә...
Иглин районындағы билдәле тоҡомсолоҡ фермаһында сыҡҡан янғында тоҡомло йылҡылар, үгеҙҙәр янып үлә
Йәкшәмбелә таңға табан Иглин районындағы ҙур ат үрсетеү фермаһында янғын сыҡҡан. Бында элиталы инглиз тоҡомло йылҡы, шулай уҡ тоҡомло үгеҙҙәр, башҡа мал да аҫралған. Янғынды һуңлап ҡына белеп ҡалғандар, паникаға бирелгән малды ҡотҡарыуы ла ауырлашҡан, 20 баш йылҡы һәләк булған. Улар ике тиҫтә йыллыҡ селекция эшмәкәрлеге һөҙөмтәһендә ошо хужалыҡта үрсетелгән булған.
Малдар янғынға тиҙ бирешеүсе ҡурала тотолған, электр менән тәьмин итеү системаһы ла насар эшләнгән, был етешһеҙлектәрҙе бөтөрөү өсөн фермер хужалығы етәкселегенә бер нисә иҫкәртеү яһалған булған.
Башҡортостан буйынса Ғәҙәттән тыш хәлдәр министрлығынан белдереүҙәренсә, чемпион, рекордсы ат та янып һәләк булған. Алдан иҫәпләүҙәр буйынса, матди зыяндың күләме 40 миллион һум самаһы.
Завод директоры Хәсән Иҙиәтуллин да, йылҡыларҙың яҡшы тоҡомло булыуына баҫым яһап, үкенесен белдерә. Уныңса, һарайға кемдеңдер ут төртөүе лә ихтимал. Сөнки тикшереү буйынса янғын ҡураның буйынан-буйына сыҡҡан.
Әле янғындың аныҡ сәбәптәре тикшерелә. Шунлыҡтан алдан ниндәйҙер һөҙөмтәләр яһауы ла мәғәнәһеҙ. Тик бер ғәйепһеҙ малдарҙың һәләк булыуы, уны ҡотҡара алмауҙары ғына күңелгә ҡыйын. Әгәр кемдер ысынлап ут төртһә, ул хужалыҡҡа ғына зыян эшләмәне, ә үҙенә лә мал ҡарғышын алды. Ә сәбәп сымдарҙың боҙоҡ булыуында икән, был иһә − битарафлыҡ билдәһе.
Фажиғә урынында БР Президенты Рөстәм Хәмитов та булды. Уның билдәләүенсә, хужалыҡты тергеҙеүгә ярҙам күрһәтеләсәк.
А. АҡБУЛАТОВА.