19.10.2019 Уҡсыларҙы һыуыҡ алмай!

Әбйәлил районының үҙәге Асҡарҙа бөгөн яндан уҡ атыу буйынса беренсе асыҡ район турниры башланды.


Бейеш батыр иҫтәлегенә арналып, Башҡортостан Республикаһының 100 йыллығы айҡанлы ойошторолған бәйгелә Әбйәлил, Ишембай, Бөрйән, Учалы, Өфө, Салауат, Белорет райондарының мәргәндәре көс һынашты.


Бөгөн, 19 октябрҙә, йәйәү ярышта ҡатын-ҡыҙҙар араһында Учалынан Динә Вәлиева 1-се урын яуланы!

Шулай уҡ Учалы районы Наурыз ауылынан Нилә Исламова 2-се урынға лайыҡ булды.

3-сө урынға Әбйәлил һылыуы Гүзәлиә Хәлилова сыҡты.

Ир-егеттәр араһында Бөрйән уҡсылары Дим Юлбирҙин менән Динис Юлбирҙин 1-се һәм 2-се урындарҙы бүлеште.

Белоретта йәшәүсе Әбйәлил егете Нуриман Хәйруллин 3-сө урынды алды.

Бәйге үҙе лә, бүләктәр ҙә елле булмаҡсы, сөнки бағыусылар ҙа, ярҙам ҡулы һуҙыусылар ҙа байтаҡ бит.

- Һәр кемгә рәхмәт, - тине баш судья Рөстәм Баһаув, - көн торошона ҡарамай, ярышҡа килгән уҡсыларға, район хакимиәтенең йәштәр эше буйынса бүлегенә (етәксеһе Шайморат Нәбиуллин), райондың мәҙәниәт бүлегенә (етәксеһе Ирек Мусин), Тал-Ҡусҡар ауылы фольклор ансамбленә (етәксеһе Сәүиә Дәүләтбаева), "Бейеш" йырын башҡарған Ласын Мәғәфүровҡа, фатиха биреүсе муллалар Әхмәт хәҙрәт Шәйәхмәтов менән Рәйес Дәүләтбаевҡа, "Ҡурай" клубына (апайлы-ҡустылы Юлиә һәм Азамат Атауллиндар), "Батыр" физкультура-һауыҡтырыу комплексына (Таһир Сәйфуллин), "Яҡтыгүл" санаторийына (Салауат Нафиҡов), "Агролайф" предприятиеһына (Вячеслав Олегович) ҙур рәхмәт. Бейеш батырҙың социаль герой икәнен халыҡ белһен! 10 йыл буйына халыҡ араһында йәшенеп йөрөп, байҙарҙы талап, байлыҡтарын халыҡҡа таратып йөрөгән башҡорт Робин Гуды ул. Юҡҡамы ни, "Уғры ла тиеп әйтмәгеҙ, Ирәндеккә ҡасҡан ирҙәрҙе" тип йырламағандар.

Иртәгә сара дауам итеп, бәйгеселәр һыбай килеш уҡ атыуҙа ярышасаҡ.