«Йәшлек» гәзите » Яңылыҡтар таҫмаһы » Балҡып өлгөрмәгән «йондоҙ»...



02.07.2019 Балҡып өлгөрмәгән «йондоҙ»...

Рәсәй йыйылма командаһының элекке билдәле футболсыһы Дмитрий Сычевҡа быйыл 36 йәш туласаҡ.
Ә бит ул яратҡан шөғөлө өсөн әллә ни өлкән дә түгел… Рәсәйҙең өмөтлө «йондоҙ»о балҡып та өлгөрмәне, ни сәбәптер тиҙ һүнде.
Ул тыумышы менән Омск ҡалаһынан. Бәләкәйҙән футбол менән хоккейҙы ярата. Үҫә барғас, тәүгеһен һайлай һәм үкенмәй. Ҡала йыйылма командаһы өсөн уйнай. Тора бара Тамбовтың урындағы клубы өсөн сығыш яһай башлай. Унда тәжрибә туплап, 2002 йылда билдәле Мәскәүҙең «Спартак» командаһына күсә. Шул уҡ йылда Рәсәй йыйылма командаһы составында донъя чемпионатына юллана. Унда алмашҡа ғына сығып, белгестәр араһында уға ҡарата ҙур ҡыҙыҡһыныу уята. Күптәр илебеҙҙең буласаҡ «йондоҙо»ның үҫеп килеүенә ышаныс менән ҡарай. Һәм шул ваҡытта уҡ Сычев, Рәсәйҙең иң көслө футболсыһы булып таныла. Шул иртәле танылыумы инде, беҙҙең йәш футболсыбыҙ «суҡыш»ын үрә күтәрә һәм «Спартак»тан ғауға менән сит илгә китә. Һуңынан ул иҫенә килеп, клубка ҡабаттан ҡайтмаҡсы була, әммә команда уны ҡабул итмәй. Һөҙөмтәлә Францияның «Олимпик» клубында ике миҙгел уҙғарғандан һуң, Рәсәйгә ҡайта һәм «Локомотив»та 11 миҙгел уйнай. Улар составында 224 осрашыуҙа 73 гол индерә.
Рәсәй йыйылма командаһы өсөн ул бөтәһе 47 осрашыу уҙғара һәм 15 тапҡыр уңышҡа өлгәшә. 2008 йылда улар составында Европа беренселегенең бронза миҙал призеры ла була.
Әлеге ваҡытта төрлө эш менән мәшғүл. Мәскәүҙә рестораны бар. Пляж футболында һәм КВН-да уйнай. Ҡайһы саҡ кинола ла төшә. 2018 йылда «Тренер» исемле кинофильмда футболсы ролен уйнай. Гонорары ла билдәле – 2,5 миллион һум. Ғаиләһе юҡ.





Автор: Нур ҠӘҘЕРБАЕВ
Фото: ТАСС


Сайтҡa күcергәБаҫып cығарырға