27.04.2019 Урмандарҙы бергәләп тергеҙәйек!
20 апрелдән 20 майға тиклем «Йәшел Башҡортостан» республика акцияһы үтә. Уның маҡсаты – урманға һаҡсыл ҡараш тәрбиәләү, йәмәғәтселекте урман ресурстарын һаҡлау, уларҙы тергеҙеү проблемаларына йәлеп итеү.
Айлыҡ барышында 27 апрелдә республиканың бөтә ҡала-райондарында «Ағас ултырт – тормош бүләк ит!» акцияһы үтәсәк. Бынан тыш, «Үҙ ағасыңды ултырт!», «Хәтер урманы» акцияларын уҙғарыу ҙа ҡаралған. Был сараларҙа урман фонды ерҙәрендә 7 мең гектарҙа 1 млн 600 мең ҡарағай, шыршы, ҡайын, йүкә, тополь үҫентеләре ултыртыу планлаштырыла. Урындағы урман хужалыҡтары йәшелләндереү айлығында ҡатнашыусыларҙы ағас ултыртыу өсөн кәрәк-яраҡтар менән үҙҙәре тәьмин итәсәк. Төп сара Өфө урман хужалығы биләмәһендә – Кушнаренко районының Солтанай ауылы янында БДАУ, Өфө урман техникумы студенттары – волонтерҙары, йәш армеецтар (барлығы 300 кеше) ҡатнашлығында уҙа.