11.07.2013 Ҡырын эш иртәгеһенә үк беленер

Ноутбук, планшетлы компьютер, кәрәҙле телефон һымаҡ портатив техника үҙҙәренең ыҡсым һәм ҡиммәтле булыуы арҡаһында бурҙарҙың, талаусыларҙың табышына йыш әүерелә. Был әйберҙәргә бәйле енәйттәр эскелек барышында күҙәтелә. Белорет ҡалаһындағы енәйәт тә ошо сценарий буйынса ҡылынған. Өс егет спиртлы эсемлектәр менән һыйланғандан һуң, табынды ҡыҙҙар менән дауам иткән. Ләкин төн етеү менән улар ҡайтырға йыйынған. Был осраҡтарҙа булғанса, егеттәр ҡыҙҙарҙың ҡайтыуын теләмәгән, берәүһе хатта ишекте бикләгән һәм асҡысты йәшергән.
Ә иртәгеһенә был асҡысты егеттәр тапмай. Туғандарынан дубликат алып, ишекте асҡас, фатир хужаһы үҙенең эштәре буйынса сығып китә. Ләкин уның табындаштары – 23 йәшлек егеттәр ҡайтырға ашыҡмай, сөнки берәүһе үҙенең кеҫәһендә юғалған асҡысты табып ала. Улар фатирға инеп, ноутбук урлай.
Зыян күреүсе полицияға мөрәжәғәт итә. Тиҙ арала егеттәр ҡулға алына, ә компьютер эйәһенә кире ҡайтарыла. «Кеше мөлкәтен йәшерен урлау» статьяһы буйынса енәйәт эше асылған.
Әбйәлил районында йәшәүсе 23 егет тә ноутбук урлауҙа ғәйепләнә. Ул «Абҙаҡ» ял йортонда Магнитогорск ҡалаһынан килеп ял иткән егеттәр һәм ҡыҙҙар менән бергә табында була. Төнө буйы байрам иткәс, иртәнсәк ҡунаҡтар үҙҙәренең номерҙарына ял итергә юллана. Әбйәлил егете уларҙың өҫтәлдә ятҡан ноутбукты үҙҙәре менән алмағанлығын күрә һәм уны урлай.
Компьютер хужаһы төшкә ҡарай ғына уяна һәм ноутбугының булмауын асыҡлай. Зыян күреүсе участка уполномоченныйына – Рифат Муллағәләмовҡа мөрәжәғәт итә. Үҙенә беркетелгән биләмәлә йәшәүселәрҙе һәм шулай уҡ ҡунаҡҡа килеүселәрҙе яҡшы белгән полиция хеҙмәткәре бурҙың эҙенә тиҙ төшә. Егет ҡулға алынған, ҡиммәтле техника эйәһенә кире ҡайтарылған.