09.04.2013 Ҡырын эш ҡырҡ йылдан һуң да беленер…

Өфөлә һигеҙ йыл элек енәйәт ҡылып, былтыр ҡулға алынған талаусыларға ғәйептәре өсөн закон алдында яуап бирергә тура киләсәк.
2004 йылда ҡоралланған ике егет баш ҡаланың Октябрь проспектында урынлашҡан йорттоң фатирына баҫып итә. Талаусылар алтын әйберҙәрҙе һәм 380 мең һумдан ашыу аҡсаны алып сыға. Енәйәтселәр аҙаҡтан өйҙә булған 16 йәшлек үҫмерҙе ата. Бәхеткә күрә, уны медиктар ҡотҡарып ҡала.
Был енәйәт оҙаҡ ваҡыт асылмай. 2012 йылда Эске эштәр министрлығының БР буйынса эксперт-криминалсылары бармаҡ эҙҙәре буйынса тап килеүҙе асыҡлай.
Әйтергә кәрәк, енәйәт ҡылыуҙа ғәйепләнгән бер егеттең элек хоҡуҡ һаҡлау органдарына эләккәне булмаған. Ул 2010 йылда әрме хеҙмәтенә алына һәм унда уның бармаҡ эҙҙәре алына һәм махсус базаға тапшырыла.
Күп тә үтмәй, РФ Эске эштәр министрлығының БР буйынса эксперт-криминалсылар үҙәге компьютеры базала һаҡланған бармаҡ эҙҙәренең енәйәт урынында ҡалдырылғаны менән оҡшаш булыуын асыҡлай. Оператив хеҙмәткәрҙәр был егетте ҡулға алғас, уның иптәше лә тиҙ табыла. Әлеге ваҡытта ике ғәйепләнеүсе лә һаҡ аҫтында. Улар «Үлтерергә маташыу» статьяһы буйынса хөкөм ителәсәк. Бынан тыш, ҡулға алыныусылар Енәйәт кодексының тағы ла бер нисә статьяһы - законһыҙ рәүештә ҡорал һаҡлау һәм башҡалары буйынса ғәйепләнә.