21.10.2019 Аҡса етешмәгәнгә сүплектәрҙе юҡҡа сығарыу һүлпән бара

Башҡортостанда йыл башынан 9 ай эсендә санкцияһыҙ сүплектәрҙең дөйөм һанынан ни бары 11,5 проценты юҡҡа сығарылған. Был һандар теле менән майҙаны 158 гектар тәшкил иткән 337 сүп ташлау урыны. Бының турала бөгөн БР Хөкүмәтендәге оператив кәңәшмәлә экология министры вазифаһын башҡарыусы Урал Искәндәров белдерҙе.

Эштең һүлпәнлеге - муниципалитеттарҙа аҡса етешмәү тип аңлатты ведомство етәксеһе. Туғыҙ районда эш бөтөнләй башланмаған. Иң күп сүп ташлау урыны Әбйәлилдә - бында улар 78.

Закондан тыш сүплектәрҙе бөтөрөү программаһы 2024 йылға тиклем ғәмәлдә ҡалғанға күрә, район-ҡалалар юл карталары алымы менән этаплы пландар төҙөй ала. Шулай итеп милли проекттың бурыстарын үтәргә мөмкин.

Артабан Урал Искәндәров яндырыу ҡоролмаһы менән сүплектәрҙе юҡҡа сығарыуҙы тәҡдим итте. Күсереп йөрөтөлмәле аппарат Свердловск өлкәһендә етештерелә. Уның хаҡы 1,5 мл һумдан (150 кг сүп-сарҙы эшкәртә) 35 млн һумға (2,3 мең кг) тиклем барып баҫа. Сүп-сар 1200 градус ялҡында яна, төтөн фильтрлана. Башҡортостан етәксеһе был вариантты Росприроднадзор менән тикшерергә ҡушты.

Республикала барлығы 2918 санкцияһыҙ сүплек бар. Уларҙың дөйөм майҙаны 2301 гектар, ҡыйың күләме 29 млн кубометр тәшкил итә. БР Экология министрлығы мәғлүмәте буйынса 1 кубик метр сүп-сарҙы эшкәртеү 850 һумға барып баҫа.