29.06.2019 Стәрлетамаҡта башҡорт музыкаһы фестивале

“Юлдаш” радиоһы һәр саҡ тыңлаусылар менән араны яҡынайтырға тырыша. Эфир тулҡындары нисек кенә уңайлы булмаһын, күҙгә-күҙ ҡарашып, ҡаршы тороп аралашыуға бер ни ҙә етмәй. Былтыр радио хеҙмәткәрҙәре Стәрлетамаҡ халҡына сағыу тамаша бүләк итеп, улар менән осрашыуҙың тәүге тәжрибәһен уҙғарҙы. Сараға 5 меңгә яҡын тамашасы йыйылды. Быйыл да Стәрлетамаҡ ҡалаһында “Юлдаш”тың концерты үтәсәк.

29 июндә Гагарин исемендәге паркта “Галактика” күңел асыу үҙәге менән берлектә башҡорт музыкаһы фестивале ойошторола. Сараны халыҡсан радио­ның иртәнге эфир хужалары Йәмил Ишмөхәмәтов, Филүс Ҡасимов һәм Ғәзиз Әбдел­мәнов алып бара. Быйылғы тамашаның да эстәлеге сағыу буласаҡ, сәхнәгә Башҡор­тостандың халыҡ артисы Светлана Хәкимова, республиканың атҡаҙанған артистары Фирүзә Париж, Гөлсөм Бикбулатова, популяр башҡарыусылар Рәфис Сирусин, Илнур Рамазанов, Динар Халиҡов, Дамир Тайыпов, Ғайсар Миңдеғолов, Ләйсән Ғәлимова, Искәндәр Сөләймәнов һәм башҡалар сығасаҡ. Концертты Стәрле­тамаҡтан ситтә йәшәүселәр интернет аша он­лайн-тран­с­ляциянан ҡарай ала, ә Гагарин исемендәге паркка килеү­селәрҙең, мауыҡ­тырғыс уйын­дарҙа ҡатнашып, “Юлдаш” радиоһының махсус бүләктәрен отоу мөмкинлеге бар.

“Юлдаш” радиоһының башҡа ҡала һәм райондарҙағы тоғро тыңлаусылары әле үк йыр-моң байрамына килергә теләктәрен белдерә. Йәмле йәйге кистә сағыу тамашаға ҡушылырға һәр кемде ихлас саҡырабыҙ.