21.06.2019 Ялған расписка

"Рәсәй гәзите" яңы мутлыҡ хаҡында хәбәр итә. Был мутлыҡтан бер кем дә һаҡланмаған, үкенескә.

Мәскәүҙә йәшәүсе Валентина Ивановна яңыраҡ машина өсөн штрафтар юҡмы икәнен белер өсөн дәүләт хеҙмәттәре сайтына инеп, Ростов өлкәһе Каменск-Шахтинск ҡалаһының һалым инспекцияһы иҫәбенә дәүләт пошлинаһын түләү буйынса 4075 һум бурысы барлығын күрә.
Валентина Ивановна ғүмерҙә лә был ҡалала булғаны ла юҡ, һәм бурысы ла булыуы мөмкин түгел. Аптыраған ҡатын редакцияға мөрәжәғәт итә. Асыҡланыуынса, Туниян В.Ю. исемле граждан расписка буйынса суд бойороғо сығарыуҙы һорап, судҡа ғариза менән барған. Был расписканы, йәнәһе лә, Валентина Ивановна яҙған. Уның буйынса ҡатын шул Туниянға 465 000 һум тейеш булып сыға. Суд бойороғон сығарыу буйынса суд та үткәрелеп тормай - уны шул ғаризаға һәм распискаға таянып ҡына сығаралар. Ә распискала - ысынлап та Валентина Ивановнаның паспорт мәғлүмәттәре. Адресы ғына икенсе күрһәтелгән. Тикшерә торғас, был муттарҙың эше булыуы асыҡланған.

Кешенең аҡсаһын урлау схемаһы түбәндәгесә, тиелә гәзиттә:

1. Мут әҙәм граждандың паспорт мәғлүмәттәрен ала (ә ул мәғлүмәттәрҙе хәҙер Интернетта табыуы ап-анһат).

2. Шул паспорт мәғлүмәттәрен яҙып, илдең икенсе өлөшөндә булһа ла бурыс тураһындағы ялған расписка менән мировой судҡа бара. Бурыслы кешенең йәшәү урыны (пропискаһы) тураһында судта артыҡ һорау биреүсе ғәҙәттә булмай.


3. Мут әҙәм суд үткәреүҙе һорамай (ә нимәгә уға повестка буйынса ике яҡты ла иҫкәртеү, судҡа саҡырыу кеүек ҡатмарлыҡтар?), уға суд бойороғо ғына кәрәк. Был документ урындағы мировой судья тарафынан әҙерләнә, һәм "бирәсәкле" кеше был хаҡта белмәйәсәк тә.


4. Алдаҡсы әҙәм ҡулына суд документын алыу менән банктарға, приставтарға бара һәм бирәсәкте ҡайтарырға ярҙам итеүҙәрен һорай. Һәм приставтар кешенең иҫәбенән (пенсия, пособие, кеҫә телефонынан һ.б.) аҡсаны алып, уға бирәсәк.

5. Банк суд ҡарарына ышана, буйһона, шуға ла аҡсаһын уға ышанып тапшырған клиент алдында яуаплылығы юҡ.

6. Полиция алдаҡ тураһында һуңлап белгәс, юғалған аҡсаны ла кире ҡайтарып, мут әҙәмде лә табып булмаясаҡ, үкенескә.

Нишләргә һуң был ҡапҡанға эләкмәҫ өсөн? Әлегә бар өмөт, үҙегеҙ беләһегеҙ, кемдә.