18.04.2019 Рәхәт йәшәмәгеҙ әле, тине, шикелле, талпандар, быйыл йоҡонан иртәрәк уянып...

Былтыр ҡыҫҡанды быйыл һөйләмәйҙәр, тиһәләр ҙә, былтыр 18 апрелгә республикабыҙҙа 19 ғына кешегә талпан ҡаҙалып өлгөргәйне. Ә быйыл талпандар үтә әүҙем булыуы менән аптырата: бөгөнгө көнгә Башҡортостандың Гигиена һәм эпидемиология үҙәгенә, уның филиалдарына талпан ҡаҙалыу сәбәпле 220 кеше мөрәжәғәт иткән дә инде!

Әле мөрәжәғәт итмәгәндәр ҙә донъялыр, сөнки, мәҫәлән, ауыл кешеһе ғәҙәттә талпан ҡаҙалыуға иҫе китеп бармай – ҡан эскесте соҡоп сығара ла, артабан һәүетемсә тормошон дауам итә. Ләкин бөжәкте лабораторияла тикшергәндә лә насар булмаҫ ине, ни тиһәң дә, улар вируслы энцефалит, боррелиоз сирҙәрен таратыусы булараҡ үтә хәүефлеләр.

Һәр район үҙәктәрендә тиерлек “МедиаЛаб” яуаплылығы сикләнгән ойошмалар эшләй, улар аша ҡанығыҙҙы тәмләп өлгөргән талпанды Башҡортостандың Гигиена һәм эпидемиология үҙәгенә ебәрергә мөмкин. Үҙ аллы түбәндәге адрестар буйынса ла лабораторияға килтерергә була:
- Өфө ҡалаһы, Шафиев урамы, 7;
- Стәрлетамаҡ ҡалаһы, Революционная урамы, 2а;
- Бөрө ҡалаһы, Калинин урамы, 18;
- Нефтекамск ҡалаһы, Социалистик урамы, 10;
- Туймазы ҡалаһы, урмансы Морозов урамы, 1.

Республика дезинфекция үҙәге 23 апрелдә Өфө ҡалаһының Мәжит Ғафури исемендәге үҙәк паркын, 23-24 апрелдә Яҡутов исемендәге паркты, 24 апрелдә Салауат Юлаев һәйкәле янындағы парк зонаһын, Хөкүмәт Йорто алдындағы скверҙы, Ленин исемендәге майҙанды, Маяковский исемендәге, Еңеүҙең 50 йыллығы, 8 март урамындағы скверҙарҙы, Киров исемендәге баҡсаны талпанға ҡаршы эшкәртә башлаясаҡ. Графикка ярашлы йәмғеһе 4 мең га майҙан эшкәртеләсәк, шул иҫәптән скверҙар, баҡсалар, парктар, пляждар... Ә эшкәртелеү эләкмәгән ерҙә йөрөгәндәргә, йәғни баш ҡаланан ситтә йәшәүселәргә, үтә һаҡ, иғтибарлы булырға ҡала.