31.03.2017 Билалдар Науруз байрамын билдәләне

Баймаҡ районының Билал ауылы халҡы яҙ башын күрһәткән матур байрамды билдәләп үтте.
Был байрам Урта Азияла, йәғни фарсы, таджик халыҡтарында килеп сыҡҡан һәм уны март айында кѳн менән тѳн тигеҙләнгән ваҡытта байрам итәләр. Ваҡыт үтеү менән был яҙ байрамын беҙҙең халыҡта ла үткәрә башлайҙар.
Ҡыш бабай (Иршат Юлмөхәмәтов) ҡышҡыһын ауылда үткән сараларға йомғаҡ яһаны, миҙгелдең имен - аман үтеүе менән ҡотлап, Яҙһылыуға (Алсәсәк Сәғитова) эстафетаны тапшырҙы.
Әле ауыл китапханаһында балалар китабы аҙналығы бара. Балалар йомаҡтар систе, һынамыштар әйтте. Байрамға килеүселәр арҡан тартышыу, "балыҡ ҡармаҡлау" кеүек тѳрлѳ уйындарҙа ҡатнашты. Ауылым уңғандары "Ҡоймаҡ байрамы"на ла әҙерләнеп килгән. Тары, бауыр, әсе, сөсө, эремсеккә төрөлгән ҡоймаҡтар булды. Һәр ҡатын-ҡыҙ үҙенең ҡоймаҡ рецебы менән таныштырып үтте. Әлифә Әминева, Гөлдәр Юлмөхәмәтова, Миңлебикә Ғайсиналарҙың ҡоймаҡтары айырым рецепт менән бешерелгән ине. Иң оло ҡатнашыусы Фәриҙә Әхмәтова байрамға сәк - сәк бешергән. "Ошо сәк - сәк кеүек ауылымда балалар күп булһын, шатлыҡ - ҡыуаныстар ишәйһен", - тигән уй-ниәт менән бешерҙем, ти ул. Ләйсән Әминева тамашасыларҙы матур йырҙары менән һөйөндөрҙө. Науруз байрамы ауыл халҡы тарафынан бешерелеп алып килгән ҡоймаҡтар менән сәй эсеү менән тамамлданды.