28.01.2014 Әгәр мэр булғың килһә...
Өфө ҡала советы ултырышында депутаттар Башҡортостандың баш ҡалаһы хакимиәте башлығы Ирек Ялаловтың вәкәләтен туҡтатыу тураһында ҡарар ҡабул итте. Сөнки килешеү буйынса уның вәкәләте 17 ғинуарға тиклем ине.
Ҡала хакимиәте башлығы вазифаһына конкурсты 12 февралдә үткәреү күҙаллана. Әлегә элекке мэр ҡала хакимиәте башлығы вазифаһын ваҡытлыса башҡара.
Устав буйынса, конкурста ҡатнашырға теләүсе ҡала советына үҙенең килеме, милке һәм 2013 йыл өсөн мөлкәт характерындағы йөкләмәләре тураһында мәғлүмәт бирергә тейеш. Шундай уҡ мәғлүмәттәр ҡатынына (иренә) һәм бәлиғ булмаған балаларына ла ҡағыла. 3 февралдә кандидаттарҙы үткәреү буйынса конкурс комиссияһы ултырышҡа йыйыла. Әйткәндәй, комиссия составында Башҡортостан Республикаһы Президенты Хакимиәте етәксеһе Сергей Молчанов, БР Президенты Хакимиәтенең Ижтимағи-сәйәси үҫеш идаралығы начальнигы Данил Азаматов, БР Дәүләт Йыйылышы – Ҡоролтай депутаты Ирек Ниғмәтуллин бар.
Ошо комиссия тәҡдим иткән кандидатуралар иҫәбенән депутаттар сираттағы ултырышында ҡала хакимиәте башлығын һайлаясаҡ.