05.09.2013 Өс һөйләм менән
БР мәғариф министры Әлфис Ғаязов белдереүенсә, республиканың гимназия һәм лицейҙары статустарын үҙгәртәсәк. Быйылғы уҡыу йылында төбәктә конкурс нигеҙендә 20 смарт-мәктәп барлыҡҡа киләсәк, төп талаптар – белем биреү сифаты, уҡыусыларҙың үҙ аллы мәғлүмәт таба һәм уны файҙалана белеүе. Министр, республика мәктәптәренең 10 проценты инновацион булырға тейеш, тигән фекерҙә.
Башҡортостанда 2015 йылға тиклем ауыл тораҡ пункттарына инеү урындарын төҙөү өсөн 264,5 миллион һум аҡса тотоноласаҡ. Был сумманың 159,7 миллион һумы – федераль бюджеттан, 104,8 миллион һум республика ҡаҙнаһынан бүленә. 17 километр һәм күперҙәрҙең 46 погон метры – был сафҡа индереләсәк ауыл пункттарына инеү ерҙәренең дөйөм оҙонлоғо.
Өфөнөң Гагарин урамындағы биш ҡатлы йорттоң фасадын легендар летчик-космонавтың портреты биҙәй. Урындағы рәссамдар Олег Кайбышев менән Артур Лукьянов ошо көндәрҙә Юрий Гагариндың 7х9 метр ҙурлыҡтағы һүрәтен төшөрөп бөткән. Ҡала халҡына был арт-объект бик ныҡ оҡшаған, кешеләр бындай үҙенсәлекле ижад проекттарының күберәк булыуын теләй.
Мифтахетдин Аҡмулла исемендәге Башҡорт дәүләт педагогия университетының башҡорт филологияһы факультетында матур йолалар етерлек. Шундайҙарҙың береһе – яңы уҡыу йылын “Башҡорт теле һәм әҙәбиәте аҙналығы” менән башлау. Быйылғы аҙналыҡта “Иң яҡшы студент”ты асыҡлау, фольклор экспедицияларына йомғаҡ яһау, йәш шағирҙар менән осрашыу, телсе ғалимдарҙың семинарын үткәреү ҡаралған.
Л. ХӘЛИТОВА әҙерләне.