28.05.2013 Башҡортостанда Төркиәнең Почетлы консулы буласаҡ
Республикала Төркиә Республикаһының Ҡазандағы Генераль консулы Сабри Тунч Ангылы булып, Башҡортостан Хөкүмәте Премьер-министры урынбаҫары Салауат Сәғитов менән осрашты.
– Өфөгә визит бик файҙалы булды. Башҡортостандың баш ҡалаһына икенсе тапҡыр килдем. “Ҙур химия” халыҡ-ара форумында ҡатнашып, шуны билдәләй алам: Башҡортостандың төбәктә был йүнәлеште үҫтереү үҙәктәренең береһенә әүерелеүен күрҙем, – тип билдәләне Сабри Тунч Ангылы. Уның һүҙҙәренсә, форумда ул Төркиәнең ҙур төҙөлөш компанияһы вәкилдәре менән танышҡан. Улар Рәсәйҙең нефть химияһы комплексы объекттарын яңыртыу проекттарында ҡатнашырға теләй.
Яңыраҡ Мәскәүҙә үткән Башҡортостан Республикаһының презентацияһында Өфөгә Төркиә эшҡыуарҙарының килеүе тураһында һөйләшеп килешелгән. Вице-премьер Салауат Сәғитов әйтеүенсә, Төркиә вәкилдәрендә нефть һәм ағас эшкәртеү, ауыл хужалығы кеүек йүнәлештәр айырыуса ҡыҙыҡһыныу уятҡан.
Быйыл көҙ Башҡортостан Президенты Рөстәм Хәмитовтың Төркиәгә эш сәфәре күҙаллана.
Ә Башҡортостанда Төркиәнең Почетлы консулын тәғәйенләү темаһы күптән алып барыла. Был мәсьәлә буйынса үҙ-ара килешеү процедураһы тамамланғас, Рәсәйҙең Сит ил эштәре министрлығына мөрәжәғәт ителәсәк.
– Почетлы консул мотлаҡ Рәсәй гражданы буласаҡ, – тине Сабри Тунч Ангылы әфәнде.