27.11.2012 Донъя яңылыҡтары
Бергәләп юҡ итмәкселәр
Рәсәй менән НАТО боеприпастарҙы утилләштереү буйынса килешеү әҙерләй.
Арсеналды, НАТО технологияһын ҡулланып, Рәсәй аҡсаһына юҡ итеү планлаштырыла. ҡоралды бергәләп утилләштереү тураһында бер нисә ай инде һөйләшеүҙәр алып барыла, әммә оборона министры алмашынғас, һуңғы аҙнала ғына эш тиҙләтелде. НАТО менән килешеү алдағы йылда әҙер булыр тип планлаштырыла. ҡоралды шартлатыу юлы менән юҡ итеү һалдаттар өсөн хәүефле. Шуға күрә сит ил тәжрибәһен ҡулланырға булдыҡ, тип аңлаталар Генераль штабта.
Билдәле булыуынса, Рәсәй Оборона министрлығы 2013 йылда шартлатыу эштәренән баш тартырға булған. Сөнки бындай операциялар йыш ҡына көтөлмәгән хәлдәргә юлыҡтыра. Мәҫәлән, быйыл Ырымбур өлкәһендә 20 гектар майҙанда янғын сыға. Һөҙөмтәлә полигонда утилләштереүгә әҙерләнгән ҡорал шартлай башлай. ҡотҡарыусыларға ашығыс рәүештә ике ауыл халҡын эвакуацияларға тура килә. 2011 йылда Әстерхан өлкәһендә ошондай операция барышында һигеҙ хәрби һәләк була, тағы өсәүһе йәрәхәтләнә.
Тотҡондарҙың ҡаршылыҡ акцияһы туҡтатылған
Копейскиҙа тотҡондар, тынысланып, үҙ камераларына таралышҡан.
24 ноябрҙә Силәбе өлкәһендәге 6-сы колонияла 250-гә яҡын тотҡон, үҙҙәренә ҡарата мөнәсәбәтте үҙгәртеүҙе, шулай уҡ режимды бер аҙ йомшартыуҙы талап итеп, ҡаршылыҡ акцияһы үткәрә. Колония янында иһә уларға туғандары ҡушыла. Силәбе өлкәһенең матбуғат хеҙмәте хәбәр итеүенсә, полиция ярҙамында тотҡондарҙы тынысландырырға һәм колония янында йыйылған кешеләрҙе таратыуға өлгәшелгән.
Әлеге ваҡытта холоҡ төҙәтеү колонияһында хәл тотороҡланған һәм тулыһынса администрация күҙәтеүенә алынған. Колония эшмәкәрлеге ҡәтғи көн тәртибе режимына ярашлы дауам итә.
«Спартак»тың тренеры үҙ вазифаһына ҡайтҡан
«Спартак»тың баш тренеры, Испания белгесе Унаи Эмири команда Рәсәй чемпионатында «Динамо»нан еңелгәндән һуң отставкаға ебәрелгән.
Хәҙер баш тренер вазифаһын «Спартак» клубының генераль директоры Валерий Карпин башҡарасаҡ. 2009 йылдан 2012 йылға тиклем был вазифаны биләгән Карпинға Рәсәй чемпионатының 18-се, 19-сы туры матчтарын, шулай уҡ чемпиондар лигаһының йомғаҡлау этабын үткәрергә тура киләсәк.
С. ЛОТФУЛЛИНА әҙерләне.