26.10.2012 Өс һөйләм менән
Өфө дәүләт нефть техник университетының йәш ғалимдары үҙҙәренең коллектив проекты менән фән һәм техника өлкәһендә РФ Хөкүмәте премияларына дәғүә итеүгә конкурста ҡатнашасаҡ. Был хаҡта РФ Мәғариф һәм фән министрлығы сайтында хәбәр ителә. Проект авторҙары араһында И. Шаммазов, Г. Александрова, О. Матросова, Н. Мовсум-заде, Р. Кәримова бар.
Өфөлә Рәсәй дәүләт социаль университеты филиалының яңы корпусы асылды. Уҡыу йортоноң яңы уҡыу бүлмәләре ҡала үҙәгендәге ремонтланған бинала урынлашты. Был шатлыҡлы ваҡиға менән юғары уҡыу йорто уҡытыусыларын һәм студенттарын Рәсәй дәүләт социаль университеты проректоры, ике тапҡыр Советтар Союзы Геройы, Рәсәй Космонавтика федерацияһы президенты Владимир Коваленок ҡотланы.
БР Ауыл хужалығы министрлығынан хәбәр итеүҙәренсә, республиканың 17 районында шәкәр сөгөлдөрөн йыйып алыу тамамланған. Быйыл татлы тамырҙың уртаса уңышы 185 центнер тәшкил итә. Шул уҡ ваҡытта Благовар, Бүздәк, Ғафури, Йәрмәкәй, ҡырмыҫҡалы, Мәләүез, Саҡмағош һәм Шишмә райондарында уңыш гектарынан 200 центнерға барып етә.
Өфөлә Нариман Сабитов исемендәге VIII Асыҡ музыкант-башҡарыусылар конкурсы бара. Унда Рәсәй ҡалаларынан 50-нән ашыу музыкант ҡатнаша. Конкурс директоры Рөстәм Сабитов әйтеүенсә, Көньяҡ Корея менән Коста-Риканан да вәкилдәр бар.
Республикабыҙҙың Милли музейында «Башҡортостандың тере һыуы – 2012» тип аталған фотокүргәҙмә асылды. Уны Шүлгәнташ ҡурсаулығы менән «Р-А-S-М» Өфө фотоклубы ойошторған. Конкурсҡа барлығы 900 эш тәҡдим ителгән.
Башҡорт дәүләт университетында философия фәндәре докторы, профессор Йәүҙәт Ғиләжетдиновтың мемориаль кабинеты асылды. Уны асыу тантанаһында БДУ ректоры Әхәт Мостафин, философия һәм социология факультеты деканы Ғәфүр Сәлихов, күренекле ғалимдың студенттары, ҡыҙы Екатерина Сенникова ҡатнашты. Йәүҙәт Ғиләжетдинов − Башҡорт дәүләт университетында социология специальносына, кафедраһына нигеҙ һалыусы һәм уның тәүге мөдире.
С. НИЯЗОВА әҙерләне.