12.10.2012 Өс һөйләм менән
Республикала көнбағыш уңышы йыйыу тамамлана, әлегә 116 мең тоннанан ашыу һуғып алынған. Уртаса уңыш гектарынан 8,2 центнер тәшкил итә, ә бына Бүздәк, Дәүләкән, Иглин, ҡырмыҫҡалы, Мәләүез, Нуриман, Стәрлетамаҡ, Туймазы, Өфө һәм Саҡмағош райондары хужалыҡтарында гектарынан 10 центнерҙан ашыу көнбағыш һуғыла. Мәләүез һәм Стәрлетамаҡ райондары хужалыҡтары – 11-шәр мең тонна, Дәүләкән һәм Көйөргәҙе райондары эшсәндәре 8 һәм 8,6 мең тонна көнбағыш йыйып алған, һигеҙ районда эш тамамланған да инде.
Башҡортостандың төрлө медицина колледждарынан егерме студент быйылғы уҡыу йылында стипендияны өсләтә күләмдә – яҡынса мең ярым һум самаһы аласаҡ. Буласаҡ медицина хеҙмәткәрҙәренә ярҙам итеүҙең бындай ысулын республикабыҙҙың Һаулыҡ һаҡлау министрлығы 2005 йылдан файҙалана. 2012 – 2013 йылғы стипендиаттар исемлегендә Өфөнөң Башҡорт медицина колледжы, Бәләбәй, Белорет, Сибай, Салауат, Стәрлетамаҡ, Туймазы медицина колледждары һәм Бөрө медицина-фармацевтика колледжы студенттары бар.
2012 йыл башынан ҡала предприятиелары һәм ойошмалары Өфөнөң Халыҡ мәшғүллеге хеҙмәтенә яҡынса 98 мең вакантлы урын тәҡдим иткән. Әлеге ваҡытта баш ҡаланың вакансиялар банкында 18 меңдән ашыу эш урыны иҫәпләнә. Шул уҡ ваҡытта ҡалала 7400 эшһеҙ иҫәпләнә, уларҙан 6500 кеше пособие ала.
14 октябрҙә Үзбәкстанда Башҡортостан Республикаһы көнөнә һәм Ә. Вәлиди исемендәге башҡорт ижтимағи-мәҙәни үҙәгенең 20 йыллығына арналған байрам концерты була. Унда беҙҙең республика вәкилдәре ҡатнашасаҡ. Ташкент ҡалаһында уҙасаҡ сараға Стәрлетамаҡ дәүләт филармонияһының “Бейеү театры” төркөмө саҡырылған.
“Айыҡ ауыл” проекты “Сәләмәт Рәсәй” Бөтә Рәсәй сәләмәт тормош алып барыу конкурсында ҡатнаша. ҡабул ителгән өс йөҙ эш араһында “Айыҡ ауыл” тәүге унау исемлегендә. Былтыр “Айыҡ ауыл” конкурсында йәмғеһе 41 райондан 99 ауыл ҡатнашҡайны, шуларҙың 30-ы финалға үтте һәм 15-е төрлө номинацияларҙа билдәләнде.
Г. БИКМӘТОВА әҙерләне.