20.07.2012 Өс һөйләм менән
Бүздәк районында янғын арҡаһында йортһоҙ ҡалған 14 ғаилә фатирлы булды. Ошо көндәрҙә уларға тантаналы шарттарҙа асҡыстар тапшырылды. Яңы йорттар республика Президенты Рөстәм Хәмитов ҡушыуы буйынса ике ай ярым эсендә төҙөлдө.
Рәсәй философтарының етенсе конгресы 2015 йылда Өфөлә үтәсәк. Бындай ҡарар Түбәнге Новгородта тамамланған алтынсы Рәсәй философтары конгресында ҡабул ителгән. Унда Башҡортостан үҙен лайыҡлы күрһәткән – конгресс материалдарында 90 авторҙың эше тәҡдим ителгән, форум эшендә 30 кеше ҡатнашҡан, конгрестың төп секцияларында беҙҙән дүрт етәксе булған – БДУ профессорҙары Александр Кудряшов, Аркадий Лукьянов, Ғәфүр Сәлихов, Сергей Семенов.
Ауырғазы районының Бишҡайын ауылында «Туслах» профилле лингвистик сыуаш лагеры үҙ эшен тамамланы. 25 бала ике аҙна дауамында сыуаш халҡының йолалары менән танышты, йырҙарын һәм бейеүҙәрен өйрәнде. Лагерь 2005 йылдан эшләй.
Йыл башынан Башҡортостанда 42 әсә яңы тыуған сабыйынан баш тартҡан (былтыр – 50 бала). Кәкүк-әсәләрҙең күбеһенә 18 – 25 йәш, уларҙың 21-е ауылда йәшәй. ҡатын-ҡыҙҙар ауыр тормошҡа, эш юҡлығына, терәктәре булмауына һылтанған.
Йыл башынан Башҡортостанда бер һыйырҙан уртаса 2221 кг һөт һауып алынған, был былтырғыға ҡарағанда 268 килограмға күберәк, уртаса көндәлек һауым 13,1 кг тәшкил итә. Был күрһәткес буйынса Мәләүез (17,3 кг), Стәрлетамаҡ, Саҡмағош (16,8 кг) һәм Ауырғазы (16,5 кг) райондары тәүге урындарҙы биләй. Республикала тулайым һауым 979021 тонна һөт тәшкил итә, 388852 тонна һыйыр ағы эшкәртелгән.
23 июлдә көндөҙгө сәғәт 5-тә «Балалар хыялының оазисы» студияһында тәрбиәләнеүсе үҫмерҙәр төшөргән «STAR» («Йондоҙ») фильмы премьераһы Өфө ҡалаһының «Родина» кинотеатрында буласаҡ, инеү бушлай. Кинематографик әҫәрҙең сюжеты түбәндәгесә: курортҡа рэп «йондоҙ»о килә һәм бәхетһеҙлеккә осрай, көтмәгәндә уны ҡотҡаралар. Изге хистәрҙе, кешелеклелекте пропагандалаған картина Болгарияла төшөрөлгән, ул инглиз телендә бара.
Г. БИКМӘТОВА әҙерләне.