13.01.2012 Өс һөйләм менән
Сығарылыш уҡыусылары өсөн иң ҡатмарлы һәм яуаплы осор етә – дүрт айҙан уҡыусыларға БДИ тапшырырға тура киләсәк. Балалар һынауҙарға психологик яҡтан мөмкин тиклем яҡшыраҡ әҙерләнһен өсөн Башҡортостан мәктәптәрендә репетиция имтихандары башланды. Математика буйынса тәүге имтихан Хәйбулла районының Аҡъяр ауылы мәктәптәрендә үтте лә инде.
Рәсәйҙәге пассажирҙар ташыу өсөн файҙаланылған бөтә төр транспорт ГЛОНАСС юлдаш навигацияһы системаһы менән йыһазландырылырға тейеш. БР Транспорт һәм юл хужалығы буйынса дәүләт комитетында әйтеүҙәренсә, төбәктә «ГЛОНАСС навигация-мәғлүмәт системалары» федераль селтәр операторы менән хеҙмәттәшлек итеү тураһындағы килешеүгә ҡул ҡуйыу нигеҙендә әҙерләнгән 2012 – 2015 йылдарға айырым маҡсатлы программа ҡабул ителгән. Был яңылыҡ пассажирҙар ташыуҙың сифатын күтәреүҙе, юл-транспорт фажиғәләрен кәметеүҙе һәм юлдарҙың машиналар үткәреү һәләтен арттырыуҙы күҙ уңында тота.
2011 йыл һөҙөмтәләренән күренеүенсә, урман хужалығы менән идара итеү буйынса Удмуртия, Татарстан, Алтай крайы һәм Вологда өлкәһе менән бер рәттән Башҡортостан да иң алдынғы төбәктәр иҫәбенә инде. Төбәктәргә бындай баһаны Рәсәй Федерацияһы Хөкүмәтендә үткән урман комплексын үҫтереү буйынса Совет ултырышында РФ Хөкүмәте Рәйесенең беренсе урынбаҫары Виктор Зубков бирҙе. Федераль урман хужалығы агентлығы етәксеһе Виктор Масляков билдәләүенсә, йөкмәтелгән бурыстарҙы үтәү буйынса күрһәткестәрҙең күпселеге, 2010 йыл менән сағыштырғанда, 2011 йылда күпкә яҡшыраҡ.
Төмәндә Иван Поддубный исемендәге грек-рим көрәше буйынса 51-се халыҡ-ара турнирҙа Башҡортостан көрәшсеһе Азамат Бикбаев 84 килограмм ауырлыҡ категорияһында бронза миҙал яуланы. Был урынды ул Новосибирск спортсыһы Евгений Богомолов менән бүлеште. Өсөнсө урын өсөн көрәштә Азамат Роман Мелешинды (ҡаҙағстан) еңде.
Яңы йылдың тәүге аҙнаһынан «Башҡортостан Республикаһы Микрофинанслау үҙәге» төбәктең бәләкәй эшҡыуарлыҡ субъекттарына микрокредиттар биреүен дауам итте. Бәләкәй бизнесҡа дәүләт ярҙамы күрһәтеүгә билдәләнгән матди ярҙамдың күләме 178,75 млн һум тәшкил итә. Микрофинанслау шарттары һәм офистарҙың адрестары тураһында тулыраҡ мәғлүмәтте www.centerrb.ru сайтынан табырға мөмкин.
Р. МӘХИЙӘНОВА әҙерләне.