17.09.2011 Өс һөйләм менән
БР Хөкүмәте ҡарары менән Башҡортостан Республикаһында 2011 – 2015 йылдарға тәғәйенләнгән төҫлө металлургияны үҫтереү программаһы раҫланды. Уның төп маҡсаты – төҫлө металлургияның тотороҡло үҫешен һәм минераль-сеймал ресурстарҙы теүәл файҙаланыуҙы тәьмин итеү. Программаны тормошҡа ашырыу өсөн, дөйөм алғанда, 35 млрд һум аҡса кәрәк буласаҡ.
БР Хөкүмәте, Һаҡлыҡ банкы һәм Торлаҡ-коммуналь хужалығын реформалаштырыуға булышлыҡ итеү үҙәге торлаҡ-коммуналь хужалығы өлкәһендә хеҙмәттәшлек итеү тураһындағы өс яҡлы килешеүгә ҡул ҡуйҙы. Документ республиканың торлаҡ-коммуналь хужалығын үҙгәртеп ҡороу буйынса берлектәге программаларҙы һәм инвестиция проекттарын әҙерләү һәм тормошҡа ашырыуға йүнәлтелгән. Бынан тыш, ул Башҡортостанда күп ҡатлы йорттарҙы һәм коммуналь инфраструктура объекттарын реконструкциялау һәм уларға капиталь ремонт үткәреү буйынса проекттарҙы финаслауға банкыларҙы йәлеп итеүҙе күҙ уңында тота.
Башҡортостан йорттарында 1,5 мең лифтты яңыртасаҡтар. Әлеге ваҡытта республиканың торлаҡ фондында 8 меңдән ашыу лифт файҙаланыла, шуларҙың 28 проценты бөгөнгө хәүефһеҙлек талаптарына яуап бирмәй. 2015 йылға тиклем республика адреслы программаһына ярашлы файҙаланыу ваҡытын тултырған лифттарҙы алмаштырыу һәм яңыртыу күҙаллана.
Кисә Башҡорт дәүләт опера һәм балет театры «Опера-гала» концерт программаһы менән 74-се миҙгелен асты. Бөгөн балет труппаһы «Ете ҡыҙ» спектакле менән сираттағы бейеү миҙгелен башлай. Тәүге ике кис театр опера һәм балет классикаһын үҙ итеүселәргә ысын байрам бүләк итмәксе.
Республикабыҙҙың Йәмәғәт берекмәләренең үҙәк дәүләт архивы хеҙмәткәрҙәре «Башҡортостан Республикаһы телдәре һәм халыҡтары. Дәүләт телдәре: тарихы һәм бөгөнгөһө» йыйынтығын сығарҙы. Китап «Башҡортостан Республикаһы халыҡтары телдәрен һаҡлау, өйрәнеү һәм үҫтереү» дәүләт программаһына ярашлы баҫтырылды. Архивтан хәбәр итеүҙәренсә, был өсөнсө йыйынтыҡ, тәүге икәүһе 2007 һәм 2008 йылдарҙа донъя күргән.
С. ЛОТФУЛЛИНА әҙерләне.