30.08.2011 Башҡортостан курорттары өсөн тауыш бирәйек

www. kurortrussia.ru туристик порталы интерактив һорау алыу үткәрә. Сайтҡа инеүселәргә Волга буйы федераль округының үҙҙәре күрергә теләгән 14 төбәгенең береһен һайлап алырға ҡушыла.
Лидерҙар рәтендә – Татарстан, Башҡортостан һәм Пермь крайы. Тауыш биреү 28 – 30 сентябрҙә Түбәнге Новгородта үтәсәк Волга буйы федераль округының туристик ресурстары фестиваль-презентацияһы алдынан үткәрелә. Был сараға әҙерлек республикала әүҙем алып барыла. Белгестәр билдәләүенсә, фестивалдә ҡатнашыу – эске һәм халыҡ-ара баҙарҙа Башҡортостанды туристик төбәк булараҡ күрһәтеү өсөн иң яҡшы мөмкинлек. Был эске һәм тышҡы туризм, төбәктең туристик эшмәкәрлегенең өҫтөнлөклө йүнәлештәрен күтәреү өсөн дә стимул булып тора. Күләмле төбәк-ара туристик сара тәүге тапҡыр беҙҙең һәм сит илдәрҙең туризм мәсьәләләре буйынса белгестәре, федераль власть органдары ҡатнашлығында үтә. Фестиваль барышында конкурстар, мастер-кластар, «түңәрәк өҫтәл»дәр, семинарҙар ойоштороласаҡ. Фестиваль һөҙөмтәләре буйынса Волга буйы федераль округын комплекслы рекламалау үткәреләсәк.