20.08.2011 Башҡортостан – туризм өлкәһендә тәүге өс лидер иҫәбендә
www. kurortrussia.ru туристик порталында интерактив һорау алыу дауам итә.
Сайтҡа инеүселәргә улар яҡын арала барырға теләгән Волга буйы федераль округындағы 14 төбәктең береһен һайларға тәҡдим ителә. Тауыш биреү Волга буйы федераль округының 28 – 30 сентябрҙә Түбәнге Новгородта үтәсәк туристик ресурстары фестиваль-презентацияһы алдынан ойошторола. Бөгөнгә Татарстан һәм Башҡортостан Республикалары, Пермь крайы тәүге өс лидер иҫәбендә.
Республикала әлеге сарала ҡатнашыу өсөн әүҙем әҙерлек бара. 15 августан БР Хөкүмәте Премьер-министры урынбаҫары Әнүәр Мәхмүтов рәйеслегендәге ойоштороу комитеты эш башланы. БР Эшҡыуарлыҡ һәм туризм буйынса дәүләт комитетының матбуғат хеҙмәте хәбәр итеүенсә, фестивалдә ҡатнашыусылар Волга буйы федераль округында туристик өлкәне үҫтереү буйынса пландар менән танышасаҡ. Шулай уҡ сарала конкурстар, мастер-кластар, «түңәрәк өҫтәл»дәр, семинарҙар һәм конференциялар ҡаралған. Фестиваль йомғаҡтары буйынса федераль округ территорияларын комплекслы рекламалау үткәреләсәк.