16.04.2011 Сәсеү-2011
Бураҙна ярыр мәл
Башҡортостан хөкүмәтендә үткән ауыл хужалығы эштәрен ойоштороу буйынса республика оператив штабының ултырышында төбәктең сәсеү кампанияһына әҙерлеге тикшерелде.
Кәңәшмә БР Хөкүмәте Премьер-министры урынбаҫары – ауыл хужалығы министры Эрнст Исаев рәйеслегендә барҙы.
Ауыл хужалығы министры урынбаҫарҙары Владимир Незнанов, Рөстәм Зәйнуллин, Рәмил Нуриәхмәтов һәм министрҙың беренсе урынбаҫары Николай Коваленко миҙгелле ауыл хужалығы эштәрен үткәреү буйынса республика штабы советы етәксеһенә орлоҡтар, минераль ашламалар күләме, техниканың әҙерлеге, ташламалы хаҡтар буйынса яғыулыҡ-майлау материалдары менән тәьмин итеү, кредит ойошмаларының ауыл хужалығы предприятиеларына финанс ярҙамы хаҡында мәғлүмәт бирҙе. Бөтөн был эштәр республикала әүҙем алып барыла.
Аграрийҙарҙың быйылғы сәсеү кампанияһына әҙерлеге тамамлана. Уның башланыуына һанаулы ғына көндәр ҡалды.
Әҙерлек тикшерелде
Волга буйы федераль округының 14 субъекты башлығы Һамарҙа Волга буйы федераль округы Советы ултырышында Рәсәй Президентының ошо округтағы тулы хоҡуҡлы вәкиле Григорий Рапота етәкселегендә яҙғы баҫыу эштәренең һөҙөмтәлелеген күтәреү мәсьәләһен тикшерҙе. Совет эшендә ил хөкүмәтенең беренсе вице-премьеры Виктор Зубков ҡатнашты.
Кәңәшмәне асып, Григорий Рапота агросәнәғәт комплексының округ өсөн төп тармаҡ булыуын билдәләне. Ул ҡоролоҡ темаһына ла ҡағылды.
Рәсәй хөкүмәтенең беренсе вице-премьеры Виктор Зубков төбәк етәкселәре алдына яҙғы сәсеүҙе сифатлы һәм ваҡытында атҡарып сығыу бурысын ҡуйҙы. Яҙғы сәсеүлек майҙандарын арттырыу тураһында ла һүҙ барҙы. Хөкүмәт үҙ яғынан аграрийҙарға кәрәкле ярҙам күрһәтә. Быйыл ауыл хужалығына ярҙам күрһәтеү буйынса дәүләт программаһын үтәүгә 125 млрд һум аҡса йүнәлтелгән. Өҫтәмә рәүештә орлоҡтар һатып алыуға средстволар бүленгән. Улар менән Рәсәйҙең ауыл хужалығы предприятиелары бөгөн 99 процентҡа тәьмин ителгән.
Советта яғыулыҡ-майлау материалдары, ашламалар менән тәьмин итеү, техниканың яҙғы сәсеүгә әҙерлеге буйынса саралар ҙа тикшерелде. Сәсеү кампанияһын ваҡытында үткәреүҙе тәьмин итеүгә кредит ойошмаларының ставкалары ла аныҡлап кителде.