19.04.2011 Өс һөйләм менән
19 − 23 апрелдә Өфөлә Мода аҙналығында Вячеслав Зайцевтың Мода йорто ла ҡатнаша. Сара барышында матурлыҡ һәм таланттар конкурстары, рәссам-модельерҙарҙың ярышы ла уҙғарыла, шулай уҡ ижади йәштәр менән коммерция структураларының әүҙем хеҙмәттәшлек итеүе өсөн шарттар тыуҙыраласаҡ. Аҙналыҡ барышында асыҡланған талантлы йәштәр Рәсәй һәм халыҡ-ара мода баҙарында эшләй башлау мөмкинлеге аласаҡ.
Республиканың агросәнәғәт комплексы предприятиелары яҙғы баҫыу эштәре алдынан ашламалар алыу менән мәшғүл. БР Ауыл хужалығы министрлығының матбуғат хеҙмәте биргән мәғлүмәттәр буйынса, үҫемлектәрҙе ашлау Саҡмағош районының ауыл хужалығы предприятиеларында айырыуса әүҙем бара, унда 3163 тонна минераль ашлама индерелгән. Шулай уҡ Стәрлетамаҡ, ҡырмыҫҡалы, Дүртөйлө райондары эшсәндәре лә етерлек ашлама туплаған.
«Өфө» халыҡ-ара аэропорты пассажирҙар һәм йөк ташыу буйынса Волга буйы федераль округында лидер булып тора. Шул уҡ ваҡытта һуңғы йылда авиапассажирҙарҙың артыуы арҡаһында уларҙы хеҙмәтләндереү өсөн ҡайһы бер техник ҡорамалдарҙың етмәүе һиҙелә башлаған, был – тиҙ арала хәл ителергә тейешле мәсьәлә. Дөйөм алғанда, Волга буйы федераль округына ҡараған үткәреү пункттары аша көнөнә алты меңдән ашыу кеше юлға сыға.
Үткән ял көндәрендә Өфөлә «Минең республикам» тип аталған социаль-экологик акция старт алды. Унда, башлыса, юғары һәм урта белем биреү учреждениелары уҡыусылары, балалар һәм йәштәр ойошмалары вәкилдәре ҡатнаша. Сара барышында үҫмерҙәр һәм йәштәр республиканың ҡала-райондарындағы халыҡ күпләп ял иткән урындарҙы сүп-сарҙан таҙарта, йылға-күлдәр ҙә иғтибар үҙәгенән ситтә ҡалмай.
Шамил Ганцевтың Яман шешкә ҡаршы фонды Өфөлә ҡатын-ҡыҙҙар өсөн федераль кимәлдәге онкологик үҙәк асыу тәҡдиме менән сығыш яһаны. Билдәле табип әйтеүенсә, беҙҙә бының өсөн квалификациялы кадрҙар ҙа, юғары технологиялар ҙа етерлек, үҙәк яман шеште тәүге стадияларҙа уҡ асыҡларға ярҙам итергә тейеш. Клиникала бигерәк тә күкрәк биҙе яман шешен профилактикалау һәм дауалау өсөн шарттар булдырырға кәрәк, ни тиһәң дә, тап ошо сир йылдан-йыл күберәк гүзәл заттың ғүмерен өҙә.
Һуңғы ваҡытта Башҡортостанда балаларға ҡаршы ауыр енәйәт ҡылыу осраҡтары йышайған, бигерәк тә кескәйҙәрҙе көсләү һәм интектереү факттары артҡан. 2010 йылда республика территорияһында бәлиғ булмағандарға ҡаршы 2445 енәйәт ҡылынған, улар араһында 8 үлтереү, 550 туҡмау, 38 көсләү осрағы бар. Дөйөм алғанда, балаларға ҡаршы енәйәт ҡылыу осраҡтары кәмеһә лә, ауыр енәйәттәр һаны артҡандан-арта бара.
Өфөлә Башҡортостан Республикаһы буйынса Эске эштәр министрлығының ЮХХДИ хеҙмәткәрҙәре һәм «Йәш гвардия»ның Башҡортостан төбәк бүлексәһе хәүефһеҙ юл хәрәкәтен пропагандалаған акция ойошторҙо. Сараны ойоштороусылар водителдәргә тәүге медицина ярҙамы күрһәтеүҙе өйрәткән, республика эсендәге хәүефле юлдарҙы билдәләгән, штрафтар тураһында мәғлүмәт туплаған иҫкәртмәләр таратты. Юл хәрәкәтен көйләүселәр был сара ярҙамында юдарҙа тәртипте көсәйтергә, яуаплылыҡты арттырырға ниәтләй.
Л. СИРАЕВА әҙерләне.