08.03.2011 Гүзәл затты нимә борсой?
Түбәнге Новгородта Рәсәй Президентының Волга буйы федераль округындағы тулы хоҡуҡлы вәкиле Григорий Рапота бер төркөм күп балалы әсә менән осрашты.
Сараны асып, тулы хоҡуҡлы вәкил: «Дәүләттең һәм йәмғиәттең үҫеше өсөн күп балалы ғаиләләр тәжрибәһе – иң ҙур ҡиммәт. Шунлыҡтан уны өйрәнергә һәм бындай ғаиләләргә ярҙам итергә кәрәк», – тине.
Йәнле осрашыу барышында әсәләр үҙҙәрен борсоған мәсьәләләргә туҡталды, уларҙы хәл итеү юлдарын барланы. Мәҫәлән, Пермь крайынан Светлана Окулова, тәрбиәгә бала алыусылар менән килешеүҙәр формаһына ҡайтанан әйләнеп ҡайтырға кәрәк, тип иҫәпләһә, Һарытау өлкәһенән Татьяна Смирнова «әсәлек капиталы»н файҙаланыу мөмкинлеген арттырыуҙы федераль кимәлдә ҡарарға тәҡдим итте. Сөнки ғаиләләр дәүләттең был ярҙамын файҙаланғанда төрлө проблемаларға юлыға икән. Йәнә пособиеның балаға йәш ярым тулғансы түләнеүенә, ә балалар баҡсаһына ике йәштән һуң ғына урынлашып булыуына ризаһыҙлыҡ белдереүселәр ҙә булды. Әсәләр пособие түләүҙе өс йәшкә тиклем оҙайтыуҙы үтенде.
Әйткәндәй, күптән түгел үткән Бөтә Рәсәй әсәйҙәр форумында Волга буйы федераль округында ғаилә советы булдырыу тураһында тәҡдим индерелгән. Григорий Рапота власть менән ғаиләнең осрашыу майҙаны булыр тип күҙалланған идеяны хуплауын белдерҙе.
Григорий Рапота, һөйләшеүгә йомғаҡ яһап, ҡыҙыҡлы һәм урынлы тәҡдимдәр өсөн ҡатнашыусыларҙың барыһына ла рәхмәт белдерҙе, киләсәктә ошондай осрашыуҙарға атайҙарҙы ла саҡырырға кәрәклеген хәбәр итте. Уның фекеренсә, тәрбиә тураһында фекер алышҡанда атайҙарһыҙ һөйләшеү килешмәй. Сара һуңында Григорий Рапота, әсәләрҙе Халыҡ-ара ҡатын-ҡыҙҙар көнө менән тәбрикләп, матур теләктәрен еткерҙе.
Р. ИШБИРҘИНА.