05.03.2011 Немецтар завод һәм диализ үҙәге төҙөйәсәк
Германия Өфөлә иҫке автомобиль покрышкаларын эшкәртеүсе завод төҙөүгә инвестициялар һалмаҡсы.
Был төҙөлөш менән полимерҙар һәм резина эшкәртеү өсөн машиналар һәм ҡорамалдар етештереү буйынса махсуслашҡан «Ермафа» фирмаһы шөғөлләнәсәк. Төҙөлөшкә инвестиция күләме 300 миллион һум тәшкил итәсәк. Завод йылына 400 мең иҫке покрышканы эшкәртеү һәләтенә эйә буласаҡ. Эшкәртелгән продукт артабан битум сәнәғәтендә файҙаланыласаҡ.
Немецтарҙың киләһе тәҡдиме – Башҡортостанда бөйөрҙәре сирләгәндәрҙе дауалау өсөн заманса медицина үҙәген төҙөү. Был эш менән «Fresenius Medical Care» фирмаһы шөғөлләнәсәк.
Германия беҙҙең республика менән нефть химияһы өлкәһендә лә хеҙмәттәшлек итеү мөмкинлеген ҡараны. Был башланғыстың башында «Лурги» компанияһы тора. Фирманың Рәсәй вәкиллеге етәксеһе Майк Кадельбах һүҙҙәренсә, «Лурги» Салауат ҡалаһы предприятиеларының береһендә изомеризация ҡоролмаһы төҙөргә, Башҡортостанда инжиниринг офисы асырға уйлай.