19.02.2011 Республика журналистарын Мәскәүҙә лә таныйҙар
Башҡортостан журналистары делегацияһы йыл һайын Мәскәүҙә үткәрелгән матбуғат балында ҡатнашты.
Унда киң мәғлүмәт сараларының «Рәсәйҙең алтын ҡауырһыны» наградаһына лайыҡ булған, шулай уҡ Рәсәй Журналистар союзы ойошторған төрлө конкурстарҙа еңеү яулаған иң яҡшы хеҙмәткәрҙәрен бүләкләү тантанаһы үтте.
Башҡортостан журналистары юғары наградаларға эйә булмаһа ла, уларҙың исемдәре бүләкләү тантанаһында бер нисә тапҡыр яңғыраны. Мәҫәлән, БР Экологтар союзы рәйесе Александр Веселовҡа экология тематикаһына төбәк һәм үҙәк киң мәғлүмәт сараларында сыҡҡан мәҡәләләре өсөн Рәсәй Журналистар союзының «Профессиональ оҫталыҡ өсөн» премияһы тапшырылды. Өфө журналисы Мадриль Ғәфүров 2010 йыл йомғаҡтары буйынса «Журналист тикшереүе» номинацияһында Бөтә Рәсәй конкурсында еңеүсе булды. «Уңыш стратегияһы – 2010» конкурсының «Урындағы киң мәғлүмәт сараларына иң һөҙөмтәле ярҙам» номинацияһында Туймазы районы хакимиәте башлығы Рәшит Хәйруллин бүләкләнде. «Кызыл таң» гәзитенең үҙ хәбәрсеһе Гөлнара Ғилемханова «Леди-жур» конкурсында дипломант булды. «Башҡортостан» гәзитенән Динә Арыҫланова «Ауырлыҡты еңеү» Бөтә Рәсәй конкурсында иң яҡшы әҫәр номинацияһында лауреат тип танылһа, «Өмет» гәзитенән Рәдиф Фәтҡуллин да ошо конкурстың дипломанты тип иғлан ителде.