28.05.2011 «УРМАН» ШАРТЛАНЫ...

Хәүефһеҙлек ҡағиҙәләрен үтәмәү оло фажиғәгә килтерҙе
26 майҙа көндөҙгө сәғәт ике тирәһендә Иглин райо­нының Урман ҡасабаһы эргәһендә урынлашҡан РФ Оборона министрлығының төп ракета-артиллерия ида­­ралығы 99-сы арсеналының боеприпастар складында ҡоралдарҙы планлы утилләштереү ваҡытында янғын сыға һәм снарядтар бер-бер артлы шартлай башлай.
Шартлау һөҙөмтәһендә 3 – 4 саҡрым радиусҡа осҡан снарядтар байтаҡ торлаҡ йортҡа ла зыян килтерә, ут урманға ла күсә. Көслө шартлау тулҡынынан йорттарҙың тәҙрәләре селпәрәмә килә, халыҡ нимә булғанын да аңламай, өйҙәрен ташлап ҡаса башлай. «ҡыҙыл әтәс»тең тимер юлына ла хәүеф менән янауы сәбәпле, Куйбышев тимер юлының Өфө – Си­ләбе йүнәлешендә йөрөүсе поездар хәрәкәте үҙгәртелә, эргәләге магистраль торба үткәргестәрҙә нефть һурҙырыу туҡтатыла. Янғын һүндереүселәрҙең, хәрбиҙәрҙең күмәк көсө ар­ҡаһында янғын тотош ҡасабаға күсмәй ҡала.
Хәрби ҡорал менән бәйле уттың киң ҡолас алыуын тотҡарлау өсөн Мәскәүҙән һәм Краснояр­скиҙан Бе – 200ЧС самолет-ам­фибия­һы, янғын һүндереүсе 42 тонна һыу һыйҙырышлы Ил–76 самолеты, снаряд­тар­ҙы зарарһыҙ­ландырыу­сы махсус роботтар ҙа килтерелә.
Эргәләге халыҡтың ғүмеренә ҡурҡыныс янау сәбәпле, Урман ҡасабаһы, Тәкәй, Надеждин ауылдарында йәшәүсе 3600 кеше эвакуациялана. Хәрби частың үҙендә етди йәрәхәт алыусылар, ҡорбандар хаҡында әлегә мәғлүмәттәр юҡ, бер кеше машина аҫтында ҡалып һәләк булған.
Фажиғә урынында БР Президенты Рөстәм Хәмитов та булды. Ул ут арҡаһында зыян күреүселәргә республика бюджетынан ярҙам күрһәтеләсәге хаҡында белдерҙе. Һуңғы мәғлүмәттәр буйынса, 50 йорт-ҡаралты янып юҡҡа сыҡҡан. Әле ут һүндерелгән, хәрби ҡорал һаҡланған урында РФ Оборона министрлығының 20 саперы эшләй, янғын эҙемтәләрен бөтөрөүгә 771 кеше, 215 берәмек техника йәлеп ителгән. Фажиғәнең төп сәбәбе – снарядтарҙы тейәгәндә хәүефһеҙлек ҡағиҙәләрен үтәмәү, тип фаразлай белгестәр. Арсеналда 100 мең тонна боеприпас һаҡланған булған.
Иглин районының Урман ҡасабаһына кисә иртә менән Рәсәй Президентының Волга буйы федераль округындағы тулы хоҡуҡлы вәкиле Григорий Рапота, Башҡортостан Президенты Рөстәм Хәмитов, Рәсәйҙең оборона министры урынбаҫары, армия генералы Дмитрий Булгаков килде. Улар штабта оператив кәңәшмә үткәрҙе һәм фажиғә урынын вертолеттан йөрөп ҡараны. Боеприпастар һаҡланған складтарҙа шартлауҙар һаман да дауам итә. Янғынды һүндереү өсөн һыу эргәләге быуанан алына. Халыҡ эвакуацияланған ауылдарҙа мародерҙар йөрөүе лә асыҡланған. Тәртип һаҡсылары урлашыуҙар булмаһын өсөн ауылдарҙа дежур итә.
Янғындан зыян күргән кешеләр кисә кис йорттарына ҡайта башланы һәм тәүге матди ярҙамды алды. Йорттары янғандар ваҡытлыса урындағы властар әҙерләгән урындарҙа йәшәп торасаҡ, уларға дүшәмбенән яңы өйҙәр төҙөй башлаясаҡтар. Төҙөлөш буласаҡ урындар билдәләнгән. Янғындан йорт-ҡаралтылары зыян күреүселәргә зыян күләме ҡайтарыласаҡ.
Фажиғә булыу сәбәпле, бөгөн үтәсәк район һабантуйы 11 июнгә күсерелде.

З. ЙӘһҮҘИНА.