24.12.2018 Балалар йылы һәм төҙөк автобустарҙа йөрөй

2019 йылдың апрель айынан башлап балаларҙы йөрөтөү буйынса яңы закон үҙ көсөнә инәсәк. Яңы тәртипкә ярашлы, республиканың 100 мәктәп автобусы, иҫке булыу сәбәпле, ҡулланыуға яраҡһыҙ тип табыласаҡ. Был хәлдән ҡотолоу өсөн йыл аҙағына тиклем муниципалитеттар автопаркын 217 яңы автобус менән тулыландырырға ҡарар ителде.

Башҡортостан Башлығы вазифаһын ваҡытлыса башҡарыусы Радий Хәбиров, Әбйәлил районына сәфәрендә Күсем руднигы мәктәбе, уның автобусы менән танышҡайны. Водителе менән аралашҡанда, тыштан таҙа, ҡараулы техниканың, ысынында иһә ун йыл буйы файҙаланылыуы хаҡында мәғлүм булды. Көн дә тиерлек 100 километр ара үтеүсе иҫке автобусты етәксе тиҙ арала яңыртыу мәсьәләһен ҡуйҙы. Радий Фәрит улы һүҙендә торҙо — күп тә үтмәй республиканың ҡала һәм район мәктәптәренә 35 автобус һатып алынды. Яңы мәктәп транспортына Күсем руднигы уҡыусылары ла ифрат ҡыуанды. Әйткәндәй, бынан тыш, Әбйәлил районына тағы өс автобус — Асҡар ауылының Т. Күсимов исемендәге гимназияһына, Байым һәм Ташбулат мәктәптәренә оҙатылды.

«Балалар мәктәпкә, автобус юлда боҙолмаһа ярар ине, тип борсолоп түгел, ә тыныс, яҡшы шарттарҙа барып етергә тейеш, тип иҫәпләйем. Улар, юл сатында һыуыҡта һәм бысраҡта тороп ҡаласаҡбыҙ, тип ҡурҡмаһын. Был юҫыҡта эште дауам итәсәкбеҙ», — тигәйне Радий Фәрит улы.

Иҫегеҙгә төшөрәбеҙ, Башҡортостан Башлығы вазифаһын ваҡытлыса башҡарыусы Радий Хәбиров ҡушыуы буйынса төбәк ҡаҙнаһынан мәктәп автобустарын һатып алыуға 242 миллион һум аҡса бүленде. Йыл аҙағына тиклем республиканың барлығы 32 белем биреү учреждениеларына автобус тапшырыу күҙаллана.