20.09.2013 Иң яҡшы 500-ҙә беҙҙеке – һигеҙ

Башҡортостандың һигеҙ уҡыу йорто «Рәсәйҙең иң яҡшы 500 мәктәбе» исемлегенә инде. Улар араһында Өфөнөң 3-сө, 39-сы, 93-сө гимназиялары, 153-сө, 83-сө лицейҙары, Стәрлетамаҡтың, Нефтекаманың, Салауат ҡалаһының 1-се гимназиялары бар.
Был мәктәптәр исемлеккә 2012 – 2013 уҡыу йылында юғары һөҙөмтәләргә өлгәшкән өсөн индерелгән. Айырыуса БДИ буйынса күрһәткестәр, быйыл Бөтә Рәсәй мәктәп уҡыусылары олимпиадаһының һуңғы этабында еңеүселәр һәм призерҙар һаны иҫәпкә алынған.
Рейтингыла тәүге ике урынды Мәскәү мәктәптәре биләй – беренселә 1535-се лицей, икенселә – Мәскәү дәүләт университеты ҡарамағындағы А. Колмогоров исемендәге мәктәп-интернат. Өсөнсө урынды Санкт-Петербургтың 239-сы физика-математика лицейы яулаған.
Рәсәйҙең иң яҡшы 500 мәктәбе исемлегенә ингән Волга буйы федераль округында урынлашҡан мәктәптәрҙе теүәл һанап үткәндә, бында беренсе урында Татарстан (19 мәктәп) тора, артабан Һамар (15), Түбәнге Новгород (13) өлкәләре, Сыуашстан (12), Пермь крайы (11), Һарытау өлкәһе (9), Башҡортостан (8), Киров өлкәһе (7), Мари Иле һәм Ырымбур өлкәһе (6-шар), Удмуртия, Ульяновск һәм Пенза өлкәләре (5-әр), Мордовия (3 мәктәп) килә.