10.02.2012 Вуз ректорҙары, райондарға сығып, халыҡ менән осраша
Башҡортостан вуздарының Ректорҙар советы республика ҡала һәм райондарында күсмә ултырыштар үткәреү тураһында тәҡдим менән сыҡҡайны. Ошондай тәүге ултырыш 8 февралдә Шишмә районында үтте. Унда БДУ ректоры Әхәт Мостафин, БДПУ ректоры Рәил Әсәҙуллин, ӨДНТУ ректоры Айрат Шаммазов, БДАУ ректоры Илдар Ғәбитов, ӨДИСА ректоры вазифаһын башҡарыусы Наталья Солодилова ҡатнашты.
ҡайҙа уҡырға барырға? Нисек итеп баланы берҙәм дәүләт имтиханы тапшырыуға һәм үҙ аллы тормошҡа әҙерләргә? 2012 йылда юғары уҡыу йортона ҡабул итеү ҡағиҙәләрендә ниндәй үҙгәрештәр бар? Ректорҙарға Шишмә районы халҡы ошондай һорауҙар менән мөрәжәғәт итте.
Әйткәндәй, бөгөн Шишмә районында 38 мәктәп иҫәпләнә. 2011 йылда район БДИ күрһәткестәре буйынса республикала өсөнсө урынға лайыҡ булған. Был иһә уҡыусыларҙың белем кимәлен күрһәтә.
Өфө дәүләт нефть техник университеты ректоры Айрат Шаммазов, яҡшы уҡыған уҡыусы юғары уҡыу йортона уҡырға ингәс тә юғалып ҡалмай, тип, бөгөн нефть университетында 19 мең студент белем алыуын, Шишмә районынан 151 студент булыуын билдәләп үтте.
БДУ ректоры Әхәт Мостафин уҡыусылар араһында профориентация эшенә ҙур иғтибар бүлде.
– Ата-әсәләр һәм уҡытыусылар был мәсьәләгә бик иғтибар бирмәй, һөҙөмтәлә абитуриент бер нисә уҡыу йортона документ тапшыра, хатта уның өсөн табип буламы ул, аграриймы, уныһы ла мөһим түгел, – тине ул. Уның фекеренсә, иң мөһиме, дөрөҫ һайлау, сөнки һүҙ тормош юлын һайлау тураһында бара. Башҡорт дәүләт университеты тураһында ла һөйләп үтте ул. Бөгөн унда, бөтә филиалдарын да иҫәпкә алғанда, 25 мең студент уҡый. Вуздың өҫтөнлөктәренең береһе – студенттарҙы эшкә урынлаштырыуға ҙур иғтибар бирелә. Белем биреү сифатына килгәндә, йыл дауамында һәр студент өс тест үтә. Әхәт Мостафин мәктәптәрҙе вуздар менән тығыҙыраҡ хеҙмәттәшлек итергә саҡырҙы. Башҡа ректорҙар ҙа уның был тәҡдиме менән килешеүен белдерҙе.
ҡыҫҡаһы, осрашыу вуз етәкселәре өсөн дә, район халҡы өсөн дә бик фәһемле булды, бик күп һорауҙарға асыҡлыҡ индерҙе.