10.02.2012 Фәндең киләсәге – йәштәр ҡулында
Фән көнө айҡанлы Башҡортостан Хөкүмәте йәш ғалимдар һәм ғилми коллективтар өсөн ойошторған ғилми эштәр конкурсында еңеүсе йәш ғалимдарҙы бүләкләү тантанаһы үтте. Конкурсҡа быйыл барлығы 200 эш тәҡдим ителгән, шулар араһынан эксперттар 30 проектты һайлап алған. Еңеүселәргә 50-шәр мең һумлыҡ гранттар тапшырылды. Улар араһында нефть химияһы, фармацевтика, банк системаһы, машиналар эшләү, юриспруденция, демография, әҙәбиәт, ауыл биләмәләрен төҙөкләндереү буйынса проект авторҙары бар.
Грантҡа лайыҡ булыусыларға дипломдарҙы Башҡортостан Хөкүмәте Премьер-министры урынбаҫары Салауат Сәғитов тапшырҙы.
– Фән үҫеш нигеҙе булып тора, киләсәгебеҙ ҙә фәнгә бәйле, – тине ул, йәш ғалимдарҙы тәбрикләп. – Тап шуның өсөн дә фәнде һәр яҡлап күтәреү республикабыҙҙа иң өҫтөнлөклө йүнәлештәрҙең береһе булып тора. Фән һәм техника өлкәһендә йәш ғалимдар өсөн премия булдырылған, гранттар тапшырыла. Фән юлын һайлаған йәштәр, Рәсәй, халыҡ-ара кимәлдә үткән сараларҙа ҡатнашып, республикабыҙҙың фәнни ҡаҙаныштарын лайыҡлы күрһәтә.
Йәш ғалимдарҙы БР Фәндәр академияһы президенты Рәмил Бәхтизин менән Рәсәй Фәндәр академияһының Өфө ғилми үҙәге рәйесе Усейн Джамилев ҡотланы.